თბილისი, 18 მარტი – Sputnik. შინაგან საქმეთა სამინისტროს სასაზღვრო პოლიციის თანამშრომლებმა ფოთის საზღვაო ნავსადგურში ნაოსნობის წესების დარღვევის ფაქტზე მალტის დროშით მცურავი მშრალტვირთმზიდი გემი BAKAN-ი დააკავეს, იუწყება საქართველოს შსს-ს პრეს-სამსახური.
გემის კაპიტანს, თურქეთის მოქალაქეს საქართველოს ბიუჯეტის სასარგებლოდ 50 000 ლარის ჯარიმა დაეკისრა.
გარდა ამისა, გემის კაპიტნის მიმართ დაიწყო საქმის წარმოება ნაოსნობის წესების დარღვევის ფაქტზე (საქართველოს ადმინისტრაციულ სამართალდარღვევათა კოდექსის 114-ე პრიმა-1 მუხლის 1-ლი ნაწილით — საქართველოს კონტინენტური შელფის, ტერიტორიული წყლების ან განსაკუთრებული ეკონომიკური ზონის შესახებ კანონმდებლობის დარღვევა).
გამოძიებას სასაზღვრო პოლიციის საგამოძიებო-ოპერატიული მთავარი სამმართველო აწარმოებს.
