თბილისი, 13 მარტი — Sputnik. იწყება მაღალმთიანი კურორტი ბეშუმის რეაბილიტაცია, პროექტის ღირებულება 2 მილიონ ლარზე მეტს შეადგენს, იუწყება აჭარის ტურიზმისა და კურორტების დეპარტამენტი.
პროექტის ფარგლებში დაგეგმილია საგზაო ინფრასტრუქტურის განახლება, ასევე წყალმომარაგებისა და კანალიზაციის სისტემების რეაბილიტაცია. სამუშაოები როგორც ადგილობრვი, ისე ცენტრალური ბიუჯეტიდან დაფინანსდება.
„კურორტის რეაბილიტაცია წელს დაიწყება. მისი დასრულების ვადები რეაბილიტაციის პროცესში გახდება ცნობილი“, — განაცხადეს რეგიონულ დეპარტამენტში.
ბეშუმი პოპულარულია როგორც სტუმრებს, ისე ადგილობრივ მოსახლეობას შორის. ის გოდერძის უღელტეხილიდან 7 კილომეტრში, ზღვის დონიდან 1930 მეტრის სიმაღლეზე მდებარეობს. კურორტის თავისებურებაა ძალზე სუფთა, გამჭვირვალე ჰაერი. განსაკუთრებით სასარგებლოა ის ბრონქული ასთმით და, ზოგადად, სასუნთქი გზების დაავადების მქონე ადამიანებისთვის.
ბეშუმში საკურორტო სეზონი ივნისის შუა რიცხვებიდან იწყება და სექტემბრის დასაწყისში მთავრდება. აგვისტოში აქ სახალხო დღესასწაული შუამთობა იმართება.
