თბილისში ქალთა საერთაშორისო დღისადმი მიძღვნილი უჩვეულო ფოტოგამოფენა გაიმართა, რომლის მთავარი მოქმედი გმირები — შეზღუდული შესაძლებლობების მქონე გოგონები — ფოტოგრაფმა გიორგი ცაავამ სხვადასხვა რაკურსში გადაიღო.
„ამ პროექტის იდეა დიდი ხანია მქონდა, მაგრამ ვერ ვწყვეტდი, თუ რომელი კატეგორიის ქალებისთვის მიმეძღვნა ქალთა საერთაშორისო დღეს ეს გამოფენა. საბოლოოდ არჩევანი შეზღუდული შესაძლებლობების მქონე პირებზე შევაჩერე და მე მოხარული ვარ, რომ მათ ეს დღე ერთ-ერთ ბედნიერ დღედ დაამახსოვრდებათ“, — განაცხადა Sputnik-თან საუბრისას გიორგი ცაავამ.
როგორც ფოტოგრაფმა აღნიშნა, პროექტის განხორციელება არც ისე მარტივი ყოფილა, როგორც თავიდან ჩანდა. პროექტის ავტორს ცხრა გოგონას გადასაღებად ორი თვე დასჭირდა.
„გადაღებების პროცესში ბევრი ისეთი სირთულე შეგვხვდა, რომლის არიდებაც შესაძლებელი იქნებოდა იმ შემთხვევაში, ჩვენი ქვეყანა შეზღუდული შესაძლებლობების პირებისთვის უფრო კარგად რომ იყოს ადაპტირებული“, — განმარტა გიორგი ცაავამ.
ფოტოგრაფის განცხადებით, ის მომავალში სხვა პროექტების განხორციელებასაც გეგმავს, რომლებიც შეზღუდული შესაძლებლობების თემას შეეხება.
