თბილისი, 9 მარტი — Sputnik. „საქართველოს აეროპორტების გაერთიანება“ ახალ შიდა რეისებს ამატებს — 10 მარტიდან შესრულდება ავიარეისები მარშრუტით მესტია-ქუთაისი-მესტია, განაცხადეს საქართველოს ეკონომიკისა და მდგრადი განვითარების სამინისტროში.
ფრენები კვირაში ორჯერ — ორშაბათსა და პარასკევს განხორციელდება. გარდა ამისა, ყოველ სამშაბათსა და ხუთშაბათს შესრულდება ავიარეისები ნატახტარი-ქუთაისი და ქუთაისი-ნატახტარი.
„რეისებს ავიაკომპანია „სერვისეარი“ შეასრულებს ახალი 17-ადგილიანი საჰაერო ხომალდით“, — განაცხადეს საქართველოს ეკონომიკის სამინისტროში.
ამჟამად ნატახტრის აეროდრომიდან რეისები მესტიის მიმართულებით კვირაში ოთხჯერ ხორციელდება — ორშაბათს, ოთხშაბათს, პარასკევსა და კვირას. 2015 წელს ამ რეისებით 4,458-მა მგზავრმა ისარგებლა.
