თბილისი, 2 მარტი — Sputnik. ქართველი მილიარდელი, მმართველი კოალიციის „ქართული ოცნების“ დამაარსებელი ბიძინა ივანიშვილი მიუხედავად იმისა რომ 2015 წელს 0.4 მილიარდი დოლარით გაღარიბდა, კვლავ საქართველოს უმდიდრეს ადამიანად და ჟურნალ Forbes-ში საქართველოს ერთადერთ წარმომადგენლად რჩება მსოფლიოს ყველაზე მდიდარ ადამიანთა რეიტინგში.
გამოცემის ინფორმაციით, 2016 წელს ივანიშვილმა 298-ე ადგილი დაიკავა რეიტინგში 4,8 მილიარდი დოლარის ქონებით. ჯერ კიდევ გასული წლის დასაწყისში, ივანიშვილს, 5,2 მილიარდიანი ქონებით, 279-ე ადგილი ეჭირა. ხოლო სექტემბერში, იმავე ქონებით — 291-ე.
ბიძინა ივანიშვილის მაქსიმალური მაჩვენებელი 143-ე პოზიციაა 2008 წელს, მაშინ მისი ქონების ღირებულება 6,4 მილიარდ დოლარს შეადგენდა. პირველად ქართველი მილიარდერი მსოფლიოს უმდიდრესი ადამიანების სიაში 2006 წელს გამოჩნდა3,9 მილიარდი დოლარის ღირებულების ქონებით და 173-ე ადგილი დაიკავა მსოფლიოში.
პირველი ადგილი მსოფლიოს ყველაზე მდიდარ ადამიანებს შორის — 2016 წელს Microsoft-ის დამფუძნებელმა ბილ გეიტსმა შეინარჩუნა. მისი ქონება Forbes-მა 75 მილიარდ დოლარად შეაფასა. მსოფლიოს ყველაზე მდიდარი ადამიანების პირველ ათეულში შევიდა 7 ამერიკელი, მათ შორის უორენ ბაფეტი (60,8 მილიარდი), ჯოზეფ ბეზოსი (45,2 მილიარდი), მარკ ცუკერბერგი (44,6 მილიარდი), ლარი ელისონი (43,6 მილიარდი), მაიკლ ბლუმბერგი (40 მილიარდი), ძმები ჩარლზ და დევიდ კოხები (39,6 მილიარდი თითოეულს)
