თბილისი, 1 მარტი — Sputnik. მარტო 2015 წელს 0–დან 5 წლამდე ასაკის 576 ბავშვი გარდაიცვალა, განაცხადა პრესკონფერენციაზე სახალხო დამცველმა უჩა ნანუაშვილმა.
განვითარებულ ქვეყნებში ყოველ ათას ცოცხლად შობილზე სიკვდილიანობის მაჩვენებელი 6–ს შეადგენს, ხოლო საქართველოში 12–ს, აღნიშნა ნანუაშვილმა.
„ჩვილ ბავშვთა სიკვდილიანობის გამომწვევ მიზეზებად შეიძლება ჩაითვალოს სამედიცინო სერვისების გაუმართაობა, ნეონატოლოგების სიმცირე, ორსულთა პატრონაჟის არაადეკვატური სისტემა, მათ შორის სამედიცინო პერსონალის დაბალი კვალიფიკაცია, მშობელთა ცნობიერების დაბალი დონე და ა.შ.“, — ციტირებს ნანუაშვილს ომბუდსმენის პრეს-სამსახური. საქართველოში ასევე მაღალია მშობიარე დედათა სიკვდილიანობა, ყოველ 100 ათასზე – 36 შემთხვევა.
რეკომენდაციაში სახალხო დამცველი მოითხოვს შემუშავდეს სპეციალური სტრატეგია და სამოქმედო გეგმა, ხელი შეეწყოს ბავშვთა სამედიცინო დაწესებულებების ხელმისაწვდომობისა და ფუნქციონირების ხარისხის გაუმჯობესებას.
