თბილისი, 1 მარტი — Sputnik. დემოკრატიულ საზოგადოებაში რელიგიურ ნიადაგზე დაპირისპირება არ უნდა ხდებოდეს, — განაცხადა აშშ–ის ელჩმა საქართველოში იან კელიმ ადიგენის ინციდენტთან დაკავშირებით.
ორშაბათს ადიგენში ქრისტიანებსა და მუსლიმებს შორის ჩხუბი მოხდა. გავრცელებული ინფორმაციით, დაპირისპირების მიზეზად რელიგიურ საკითხთა საბჭოს გადაწყვეტილება იქცა, რომლის თანახმადაც, მუსლიმებს სასაფლაოსთვის ახალი ტერიტორია გამოეყოფათ.
„დემოკრატიულ და ინკლუზიურ საზოგადოებაში ასეთი ინციდენტები არ უნდა არსებობდეს. ეს სასურველი არ არის დემოკრატიის განვითარებისთვის და ვნებს როგორც მთავრობას, ისე საზოგადოებას“, — განაცხადა ამერიკელმა დიპლომატმა ტელეკომპანია „იმედის“ ეთერში.
ადიგენის ინციდენტთან დაკავშირებით აღშფოთება გამოთქვა საქართველოს მუსლიმთა კავშირის თავმჯდომარემ ტარიელ ნაკაიძემ, რომელმაც ფაქტის დაუყოვნებელი გამოძიება და დამნაშავეების დასჯა მოითხოვა.
ინციდენტისას რამდენიმე ადამიანი დაშავდა. დაკავებულთა თაობაზე ინფორმაცია არ ვრცელდება.
