თბილისი, 24 თებერვალი — Sputnik. ძნელია იპოვო ადამიანი, რომელსაც McDonald's-ის შესახებ არ სმენია, ამ ფასთ-ფუდის მეტად პოპულარული რეკლამა პლანეტის ყველა წარმომადგენლისთვის ნაცნობია. შესაძლოა, სულ მალე ამ საკვების მოყვარულებმა ის ერევანშიც აღმოაჩინონ, წერს „Sputnik სომხეთი“.
მიმდინარე წლის აპრილში ქალაქ ორლანდოში (აშშ, ფლორიდის შტატი) McDonald's-ის წარმომადგენელთა დიდი შეხვედრა გაიმართება, სადაც მსოფლიოში პოპულარული სწრაფი კვების რესტორნის სომხეთში გამოჩენის საკითხი გადაწყდება.
„ვფიქრობ, საკითხი McDonald's-ის სომხეთში გახსნის შესახებ დადებითად გადაწყდება. პირველ რიგში, თბილისის McDonald's-ში ბევრი ჩამოდის სომხეთიდან, ანუ ეს მოთხოვნადი ფასთ-ფუდია სომხურ მოსახლეობაში, მეორეც — რესტორნის გახსნა 150 ათასზე ნაკლები მოსახლეობის ქალაქებშიც შეიძლება“, — განაცხადა ჭყონიამ.
ქართველი ბიზნესმენის განცხადებით, პირველი McDonald's-ი ერევანში გაიხსნება. ამასთან, რესტორანი ყველა სტანდარტს უნდა შეესაბამებოდეს — როგორც საკვებით, ისე არქიტექტურით. რესტორანი ჰარმონიულად უნდა ერწყმოდეს ქალაქის იერ-სახეს.
McDonald's-ის ასაშენებლად 1500 კვ. მ. ფართობი, ასევე მოსახერხებელი ადგილმდებარეობაა საჭირო.
„ეს პროექტი მნიშვნელოვანია ერევნისთვის. დედაქალაქის შემდეგ McDonald's-ის გახსნას სომხეთის სხვა ქალაქებშიც ვგეგმავთ. ჩვენი მონაცემებით, თქვენი ქვეყნის ტერიტორიაზე ქსელის 8 რესტორნის გახსნაა შესაძლებელი. პროექტის მასშტაბის გათვალისწინებით, 30 წლამდე ასაკის დაახლოებით 1000 ადამიანი დასაქმდება. მათ საშუალება ექნებათ, უმაღლესი დონის ტრენინგები გაიარონ“, — დასძინა ჭყონიამ.
ქართველმა ბიზნესმენმა ასევე აღნიშნა, რომ რესტორნების ქსელის გახსნის გარდა, გეგმაში ასევე სომხეთის სოფლის მეურნეობის განვითარებაა.
ჭყონიას განცხადებით, სომხურ McDonald's-ში ადგილობრივი წარმოების პროდუქტები უნდა შევიდეს. მან ასევე დასძინა, რომ ეს მსხვილი ინვესტიციაა და სომხეთის ეკონომიკისთვის სერიოზული გამოწვევა იქნება.
