თბილისი, 22 თებერვალი — Sputnik. დაავადებათა კონტროლის ეროვნული ცენტრის მონაცემებით, საქართველოში გრიპის ვირუსით ამ დროისათვის 18 ადამიანია დაღუპული, მათგან 17 H1N1 შტამის ვირუსით და ერთი H3N2-ით.
მიუხედავად აღნიშნული მონაცემებისა, სპეციალისტები გრიპის გავრცელების ინტენსივობის კლებაზე საუბრობენ.
როგორც დაავადებათა კონტროლის და საზოგადოებრივი ჯანმრთელობის ეროვნული ცენტრის გენერალურმა დირექტორმა ამირან გამყრელიძემ ტელეკომპანია „რუსთავი 2“-ს განუცხადა, სულ ლაბორატორიულად დადასტურებულია გრიპით დაავადების 359 შემთხვევა, რომელთაგან უმეტესობა H1N1 შტამის ვირუსია. ხოლო გარდაცვალების ყველა შემთხვევა კლინიკებში დაგვიანებულ მიმართვასა და თანმდევ ქრონიკულ დაავადებებთან იყო დაკავშირებული.
