თბილისი, 20 თებერვალი — Sputnik. ქართველ ქალ მოჭადრაკეთა ნაკრების ლიდერმა ნანა ძაგნიძემ ტეირანის გრან-პრის მერვე ტურში მოუგო ხარიკი დრონოვალის ინდოეთიდან და სატურნოირო ცხრილში ერთპიროვნულად ლიდერობს, იუწყება ფიდე-ს ოფიციალური საიტი.
საქართველოს მეორე წარმომადგენელმა ნინო ბაციაშვილმა პირველობა რუს ვალენტინა გუნინას დაუთმო და 1,5 ქულით სატურნირო ცხრილის ბოლოში აღმოჩნდა.
მეცხრე ტურში ძაგნიძე შავი ფიგურებით შვედ პია კრამლინგს ეთამაშება, ბაციაშვილი კი — ხარიკა დრონოვალის.
გრან-პრი-ს ფარგლებში წელს კიდევ ორი ტურნირი ჩატარდება — მაისში თბილისში და ივლისში ჩინეთის ქალაქ ჩენდუში.
საანგარიშო ტურის შემდეგ ქართველი მოჭადრაკის აქტივში 6,5 ქულაა და იგი თავის უახლოეს მეტოქეებს — ნატალია პოგონინას (რუსეთი), ჟაო ქსიუს (ჩინეთი) და იუ ვენჟუს (ჩინეთი) — ერთი ქულით უსწრებს.
