თბილისი, 18 თებერვალი — Sputnik. კრემლს ჯერჯერობით ირანში საზენიტო- სარაკეტო სისტემის С-300 მიწოდების კონკრეტული ვადის დასახელება არ შეუძლია, რადგანაც ამჟამად გადახდის საკითხი გადაწყვეტილი არ არის, განაცხადა ხუთშაბათს რუსეთის პრეზიდენტის პრეს-მდივანმა დმიტრი პესკოვმა.
„ეს ვადები ჯერ განსაზღვრული არ არის, რადგანაც გადახდასთან და ა. შ. დაკავშირებული პრობლემებია. იქ გარიგება სათანადო თანხით უზრუნველყოფილი ჯერ კიდევ არ არის, ამიტომ კონკრეტულ ვადებზე საუბარი ნაადრევია“, — განაცხადა პესკოვმა.
2007 წელს ხელმოწერილი კონტრაქტის მიხედვით, რუსეთმა ირანს დაახლოებით 800 მლნ აშშ დოლარის ღირებულების С-300ПМУ-1-ის საზენიტო-სარაკეტო სისტემის ხუთი დივიზიონი უნდა მიაწოდოს.
თუმცა, 2010 წლის 9 ივნისს გაეროს უშიშროების საბჭოს რეზოლუციის მიღებასთან დაკავშირებით, რომელმაც ირანისთვის თანამედროვე შეიარაღების გადაცემა აკრძალა, რუსეთსა და ირანს შორის სამხედრო-ტექნიკური თანამშრომლობის შეჩერდა. სანქციების შემოღების შედეგად რუსეთ-ირანის კონტრაქტი С-300-ის შეძენაზე გაუქმდა.
2015 წლის აპრილში რუსეთის პრეზიდენტმა ვლადიმირ პუტინმა ირანისთვის С-300-ის მოწოდების აკრძალვა გააუქმა. ივნისში პრეზიდენტის მრჩეველმა სამხედრო-ტექნიკური თანამშრომლობის სფეროში ვლადიმირ კოჟინმა განაცხადა, რომ მოსკოვი და თეირანი С-300-ის მიწოდებაზე კონტრაქტს ამზადებენ.
ირანის თავდაცვის მინისტრ ჰოსეინ დეჰანის განცხადებით, რუსული С-300-ის კომპლექსების პირველი პარტიის მიწოდება ირანისთვის 2016 წლის პირველ კვარტალში განხორციელდება.
