თბილისი, 16 თებერვალი — Sputnik. ნიკა კოჩაროვი & Young Georgian Lolitaz-ი საერთაშორისო კონკურს „ევროვიზია 2016“-ზე კენჭისყრით შერჩეული სიმღერით Midnight Gold წარდგებიან.
სიმღერა ჟიურისა და აუდიტორიის შერეული კენჭისყრით ხუთი ინგლისურენოვანი სიმღერიდან შეარჩიეს: Midnight Gold, Pain in my Heart, Right and Wrong, Sugar and Milk და We agree.
კონკურსის არსებობის ისტორიაში პირველად, „ევროვიზია 2016“-ში რეკორდული რაოდენობა — 43 ქვეყანა მიიღებს მონაწილეობას.
ჯგუფი Young Georgian Lolitaz (YGL) 2000 წელს დაარსდა. ის ოთხი მუსიკოსისგან შედგება, ესენი არიან: ნიკა კოჩაროვი, ლევან შანშიაშვილი, გიორგი მარი და დიმა ოგანესიანი. მუსიკოსებს საქართველოსა და მის ფარგლებს გარეთ სხვადასხვა როკ-ფესტივალში აქვთ მიღებული მონაწილეობა.
გასულ წელს ევროვიზიაზე საქართველო ნინა სუბლატმა წარადგინა და მე-11 ადგილი დაიკავა.
