თბილისი, 6 თებერვალი — Sputnik. საქართველოს რაგბის ნაკრებმა თბილისში გამართულ ევროპის ერთა თასის მატჩში გერმანიის ნაკრებს 59:7 მოუგო.
შეხვედრის მეექვსე წუთზე ანგარიში სტუმრებმა გახსნეს. თუმცა მას მერე ანგარიში ციფერბლატზე მხოლოდ ქართველთა სასარგებლოდ იცვლებოდა. საერთო ჯამში ქართველ რაგბისტებს 9 მცდელობა ჰქონდათ (სხვადასხვა მოთამაშეების მიერ) და შვიდი რეალიზაცია (ყველა ლაშა მალაღურიძემ შეასრულა).
დავით ქარჩავა, რომლისთვისაც საქართველოს რაგბის ნაკრებში ეს უკვე 88-ე მატჩი იყო, ამ მაჩვენებლით მერაბ კვირიკაშვილს გაუსწორდა. ამჟამად ორივე რაგბისტი რეკორდსმენია ეროვნულ ნაკრებში გამართული მატჩების რიცხვით.
შემდეგ გასვლით თამაშს საქართველოს ნაკრები პორტუგალიის წინააღმდეგ გამართავს.
