თბილისი, 5 თებერვალი — Sputnik. ოლიმპიური ჩემპიონი ტყვიით სროლაში, მსოფლიოსა და ევროპის მრავალგზის ჩემპიონი ნინო სალუქვაძე სპორტის საპატიო რაინდის წოდებით დაჯილდოვდა, იუწყება საქართველოს სპორტის სამინისტროს ოფიციალური ვებგვერდი.
ანალოგიური წოდება მიენიჭა ასევე ვახტანგ სალუქვაძეს — ნინოს მწვრთნელსა და მამას.
სამახსოვრო მედლები სპორტსმენსა და მის მწვრთნელს საქართველოს სპორტისა და ახალგაზრდობის საქმეთა მინისტრმა ტარიელ ხეჩიკაშვილმა გადასცა.
ნინო სალუქვაძე ერთადერთი ქართველი სპორტსმენია, რომელმაც ყველა სახის ოლიმპიური მედალი მოიპოვა — ოქრო და ვერცხლი — 1988 წელს და ბრინჯაო — 2008 წელს.
რიო-დე-ჟანეიროს ოლიმპიური თამაშები სალუქვაძისთვის რიგით მერვე ოლიმპიადა იქნება. თანამედროვე ოლიმპიადების ისტორიაში ეს შედეგი მხოლოდ რამდენიმე სპორტსმენს აქვს.
