თბილისი, 11 იანვარი — Sputnik. სახელმწიფო უსაფრთხოების სამსახურის თანამშრომლებმა რადიოაქტიური ნივთიერების, ცეზიუმ 137–ის უკანონო გაყიდვაში ეჭვმიტანილი სამი პირი დააკავეს, რომლებიც ნივთიერების 100 ათას აშშ დოლარად გასხვისებას აპირებდნენ.
„გამოძიებამ დაადგინა, რომ დანაშაულებრივი ჯგუფის წევრებმა განკარგვის მიზნით უკანონოდ შეიძინეს და ქ. თბილისში უკანონოდ, დადგენილი წესების დაუცველად, შეინახეს რადიოაქტიური ნივთიერება ცეზიუმის რადიოაქტიური იზოტოპი Cs137 (ცეზიუმ 137)“, — ნათქვამია სახელმწიფო უსაფრთხოების სამსახურის განცხადებაში.
რადიოლოგიური ექსპერტიზის დასკვნის თანახმად, ცეზიუმ 137 საშიშია ადამიანის ჯანმრთელობისათვის.
გამოძიება რადიოაქტიური ნივთიერებისადმი უკანონო მოპყრობისა და გასაღების ფაქტზე მიმდინარეობს (საქართველოს სსკ-ის 230-ე მუხლის პირველი ნაწილით).
