თბილისი, 28 დეკემბერი — Sputnik. დღეს არსებული საპენსიო სისტემა, რომელიც სოლიდარულ პრინციპზე არის დაფუძნებული და გადასახადების გადამხდელთა მიერ შევსებული ბიუჯეტიდან საპენსიო გასაცემლების გაცემას გულისხმობს, რეფორმირებას საჭიროებს, მიაჩნია ახალგაზრდა ფინანსისტთა და ბიზნესმენთა ასოციაციის ვიცეპრეზიდენტს შოთა გულბანს.
„საჭიროა იმგვარი ალტერნატივის გაჩენა მოქალაქეებისთვის, რაც მათი შრომისა და სამუშაო სტაჟის შესაბამისად, მათივე ფინანსურად უზრუნველყოფილი სიბერის გარანტი იქნება. მსგავსი ტიპის მოდელის ჩამოყალიბებაზე ეკონომიკის სამინისტროში სპეციალური ჯგუფი უკვე მუშაობს და საზოგადოება გარკვეულ ინფორმაციასაც ფლობს ამ საკითხთან დაკავშირებით. მიუხედავად ამისა მიგვაჩნია, რომ საჭიროა უფრო მეტი კონკრეტიკა, მეტი სიცხადე და მაგალითებით საუბარი იმ მიზნობრივი ჯგუფებისთვის, რომლებსაც მომავალში ეს რეფორმა უნდა შეეხოთ“ –განაცხადა შოთა გულბანმა
შოთა გულბანის თქმით, კერძო საპენსიო ფონდში დაგროვების შემთხვევაში, ე.წ. საპენსიო გასაცემლები ყოველ თვე გაცილებით სოლიდური თანხა იქნება, რასაც დაემატება სახელმწიფოს ბიუჯეტიდან გასაცემი პენსია.
„ეკონომიკაში ნებისმიერი ტიპის მოვლენის პროგნოზირებისას გარკვეული დაშვებების გაკეთება გვიწევს. ამ შემთხვევაშიც, კონკრეტული დაშვებების საფუძველზე დავიანგარიშოთ, თუ რა თანხის აღება მოუწევს მოქალაქეს, თუ ის მაგალითად 30 წელი ყოველ თვე 6%–ს დაზოგავს კერძო საპენსიო ფონდში, 1000 ლარიანი ხელფასის პირობებში. ობიექტურთან ყველაზე ახლო სურათის მისაღებად ვითვალისწინებთ ინფლაციის მაჩვენებელს, რომელიც სებ–ის პროგნოზის მიხედვით გრძელვადიან პერიოდში 3% უნდა იყოს, დაგროვების დაწყებიდან პირველი 5 წელი ინფლაცია 4,5%, ხუთიდან ათ წლამდე 4%, ხოლო თერთმეტიდან 50 წლამდე 3% გავითვალისწინოთ. კერძო საპენსიო ფონდიდან მიღებული შემოსავლის ყველაზე პესიმისტური დაშვება გავაკეთოთ – 3%. მთლიანი შიგა პროდუქტის ზრდა 30 წლიან პერიოდზე საშუალოდ 4%. ხელფასების ზრდა საშუალოდ 6%. ამ მაჩვენებლების გათვალისწინებით, თუ პენსიაზე გასული პიროვნება გადაწყვეტს, რომ მის მიერ დაგროვილი თანხა დახარჯოს 20 წლის განმავლობაში, მას ყოველ თვე მოუწევს 345 ლარის აღება რეალურ გამოხატულებაში, ხოლო ნომინალური რა თქმა უნდა გაცილებით მეტი იქნება. პლიუს ამას, თუ მოქალაქე გადაწყვეტს, რომ 6%–ის ნაცვლად შეიტანოს მაგალითად 8%–ის კონტრიბუცია, იგივე ეკონომიკური მაჩვენებლების გათვალისწინებით ის 30 წლის შემდეგ ყოველ თვე აიღებს 465 ლარს“ – განმარტა შოთა გულბანმა.
მისი თქმით, ამ რეფორმის განხორციელება, საქართველოს მოქალაქეებს მისცემს შანსს, რომ მათი სიბერე გაცილებით უფრო უზრუნველყოფილი იყოს და ნაკლებ დამოკიდებული სახელმწიფოზე, ვიდრე ამჟამად არის.
„ხაზგასასმელია ის გარემოებაც, რომ კერძო საპენსიო ფონდების არჩევა ნებაყოფლობითი იქნება და არ ექნება რაიმე სახის იძულებითი ფორმა და ვისაც რეფორმაში ჩართვა არ სურს, მას შეუძლია ჩვეულებრივ მიიღოს სახელმწიფოსგან ის თანხა, რასაც აქამდე იღებდა“– განაცხადა შოთა გულბანმა
