თბილისი, 8 დეკემბერი – Sputnik. შსს-ს თანამშრომლებმა კომპიუტერული მონაცემების უკანონოდ მოპოვების, შენახვისა და facebook-ის სხვადასხვა მომხმარებლის პროფილებზე უკანონო შეღწევის ფაქტზე ორი პირი — ვასილ ქ. და რაინდი კ. დააკავეს, ნათქვამია უწყების მიერ გავრცელებულ განცხადებაში სამშაბათს, 8 დეკემბერს.
გამოძიებით დადგინდა, რომ 1992 წელს დაბადებულმა ვასილ ქ.–მ კომპიუტერულ სისტემაში უნებართვოდ შეღწევისა და სხვისი კომპიუტერული მონაცემების უკანონოდ მოპოვების მიზნით, facebook —ის ავტორიზაციის მსგავსი ვებგვერდი დაამზადა დომეინით – htt://facebook-photos.ga/gggg44.
უწყების განმარტებით, ვასილ ქ. facebook-ზე სხვადასხვა სახის პოსტებს ათავსებდა. მომხმარებელს კი, პოსტით დაინტერესების შემთხვევაში, ხელახალი ავტორიზაცია უნდა გაევლო და ამ დროს მისი მონაცემები ვასილ ქ.-ს მიერ ვებჰოსტინგზე სპეციალურად შექმნილ ფაილებში იგზავნებოდა.
„აღნიშნულ ფაილებში აღმოჩენილია სოციალურ ქსელ facebook-ის 1010 მომხმარებელის სახელი და პაროლი. უკანონოდ მოპოვებული, ზემოხსენებული მონაცემების გამოყენებით, ვასილ ქ. უნებართვოდ აღწევდა სოციალური ქსელ facebook-ის მომხმარებელთა გვერდებზე და აღნიშნულ მომხმარებლებს მის მიერ სპეციალურად, რეკლამების განთავსების მიზნით შექმნილ ჯგუფში უნებართვოდ ამატებდა“, – აღნიშნულია განცხადებაში.
ასევე, გამოძიებამ დაადგინა, რომ რაინდი კ-მ., სხვადასხვა პროგრამული უზრუნველყოფის გამოყენებით, უკანონოდ მოიპოვა, შეაღწია და დაშვების პაროლები შეუცვალა „facebook.com“-ის მომხმარებლებს. „შემდეგ აღნიშნული მომხმარებლების სახელით, მათი პროფილებიდან რეკლამებს პოსტავდა, რაშიც რეკლამის დამკვეთისაგან ანაზღაურებას იღებდა“, – ნათქვამია პრესსამსახურის განცხადებაში.
გამოძიება საქართველოს სსკ-ის 284-ე მუხლის 1-ლი, 158-ე მუხლის 1-ლი და 285-ე მუხლის 1-ლი ნაწილებით და 286-ე მუხლის მე-3 ნაწილის „გ“ ქვეპუნქტით მიმდინარეობს.
