მემარჯვენე "ეროპვნული ფრონტის" ლიდერი მარინ ლე პენი სიტყვით გამოვიდა მომხრეების წინაშე და მადლობა გადაუხადა მათ მას შემდეგ, რაც რეგიონული არჩევნების პირველ ტურში მისი პარტია 6 რეგიონში ლიდერობდა.
საფრანგეთში რეგიონული არჩევნების პირველი ტურის შედეგები, რომელშიც "ნაცფრონტი" ერთპიროვნულად ლიდერობდა 6 რეგიონში, მარინ ლე პენმა "დიდებულ შედეგად" დაასახელა.
"ჩვენ მადლიერები ვართ მომხრეებისა და ამომრჩევლების ნდობის გამო, რომლებმაც ჩვენ მხარი დაგვიჭირეს, მათი თანადგომისა და ხმებისათვის, რომლებმაც ჩვენ საშუალება მოგვცა მიგვეღწია ამ დიდებული შედეგებისათვის", – განაცხადა მან.
კვირას ჩატარებული არჩევნების პირველი ტურის შედეგების მიხედვით, მარინ ლე პენის "ეროვნული ფრონტი" საფრანგეთის მეტროპოლიის 13–დან 6 რეგიონში ლიდერობს, ნიკოლა სარკოზის "რესპუბლიკელები" – ოთხში, სოცპარტია კი – ორში. კორსიკაზე ლიდერობს მემარცხენე პარტიების ალიანსი.
კერძოდ, ლე პენმა საგრძნობლად ჩამოიტოვა კონკურენტები ჩრდილოეთ რეგიონში ნორ–პა–დე–კალ–პიკარდიაში — 40–41% 24–25%–ის წინააღმდეგ "რესპუბლიკელების" კანდიდატთან და 18–18,5% სოცპარტიის წარმომადგენელთან.
თავის მხრივ, მისმა ძმისშვილმა მარიონ მარეშალ–ლე პენმა, რომელიც ქვეყნის სამხრეთით პროვანს–ალპ–ლაზურის რეგიონში იყრის კენჭს, ნოკდაუნში ჩააგდო "რესპუბლიკელების" წარმომადგენელი მერი ნიცა კრისტიან ესტროზი – 40,9–41,9% — ნაცფრონტი, 24,5–25% — "რესპუბლიკელები", 18,0% – სოცპარტია.
