ქუთაისელ გულშემატკივრებსა და თბილისის „დინამოს“ კალათბურთელებს შორის ინციდენტი მოხდა

თბილისი, 28 ნოემბერი — Sputnik. კალათბურთში საქართველოს ჩემპიონატის მეშვიდე ტურის მატჩში „ქუთაისი“ — „დინამო“ ადგილობრივ გულშემატკივარსა და დედაქალაქის კალათბურთელებს შორის შეხლა-შემოხლა გაიმართა.
 ინციდენტი მატჩის დამთავრებამდე რამდენიმე წამით ადრე მოხდა. იმ დროისთვის „ქუთაისი“ ანგარიშით 75:64 იგებდა და მატჩის ბედი უკვე გადაწყვეტილი იყო. სიტყვიერი დაპირისპირება ქუთაისელ გულშემატკივარსა და თბილისის „დინამოს“ სათადარიგო მოთამაშეებს შორის დაიწყო, რომელიც შემდეგ შეხლა-შემოხლაში გადაიზარდა.
 საბედნიეროდ, ინციდენტს შემდგომი განვითარება არ მოჰყოლია, ვნებები სამ წუთში ჩაცხრა, ამის შემდეგ კალათბურთელებმა მატჩი დაასრულეს.
 მიიღებს თუ არა საქართველოს კალათბურთის ფედერაცია რაიმე სანქციებს მომხდართან დაკავშირებით, ჯერჯერობით უცნობია.