თბილისი, 31 ოქტომბერი — Sputnik. ეგვიპტეში რუსული თვითმფრინავის ავიაკატასტროფის შედეგად ბორტზე მყოფი არც ერთი მგზავრი არ გადარჩენილა, იტყობინება სააგენტო „ასოშეიტედ პრესი „ ეგვიპტის ხელისუფლების წარმომადგენლებზე დაყრდნობით.
„სინაიზე რუსული თვითმფრინავის ავიაკატასტროფის შემდეგ არავინ გადარჩენილა“, — ნათქვამია სააგენტოს შეტყობინებაში.
მანამდე მაშველებმა განაცხადეს, რომ ავიაკატასტროფის ადგილას 100-ზე მეტი დაღუპული იპოვეს, რომელთაგან 17 ბავშვია. თავის მხრივ სააგენტო „რეიტერმა“ გაავრცელა ინფორმაცია, თითქოს მაშველებს თვითმფრინავის ნამსხვრევებიდან მგზავრთა ხმები ესმოდათ.
ეგვიპტის სამოქალაქო ავიაციის სამინისტროს განცხადებით, ავიაკომპანია „კოგალიმავია“-ს კუთვნილი ლაინერი Airbus-321, რომელიც რეის 9268-ს ასრულებდა შარმ-ეშ-შეიხი — სანკტ-პეტერბურგი, ეგვიპტიდან 5:51 წუთზე (თბ.დ) გამოფრინდა და რადარების ეკრანიდან 23 წუთში გაქრა. ავიალაინერის ბორტზე 217 მგზავრი და 7 ეკიპაჟის წევრი იმყოფებოდა.
სინაის ადმინისტრაციაში დააზუსტეს, რომ თვითმფრინავი ნახევარკუნძულის ცენტრალურ ნაწილში ჩამოვარდა, მთებს შორის ელ-კანტალასა და ელ-ლაკსიმას რაიონებთან, ქალაქ ელ-ხასნასთან.