თბილისი, 15 სექტემბერი — Sputnik. საქართველოს ყოფილი პრემიერ–მინისტრ ბიძინა ივანიშვილის არასამთავრობო ორგანიზაცია „მოქალაქემ“ უარყო გავრცელებული ინფორმაცია იმის თაობაზე, რომ თითქოს მილიარდელის ვაჟს, უტა ივანიშვილს ქვეყნის პოლიტიკურ ცხოვრებაში ჩართვა აქვს განზრახული.
„ბოლო დღეებში რამდენიმე საინფორმაციო საშუალებამ გაავრცელა დეზინფორმაცია უტა ივანიშვილის პოლიტიკაში შესაძლო ჩართვის შესახებ, რაც მიზნად ისახავს საზოგადოების შეცდომაში შეყვანას. საზოგადოება „მოქალაქე“ აცხადებს, რომ მსგავსი ინფორმაციის გავრცელებას არანაირი საფუძველი არ გააჩნია. უტა ივანიშვილი პოლიტიკაში ჩართვას გამორიცხავს, როგორც ამ ეტაპზე, ისე სამომავლოდ“, — ნათქვამია განცხადებაში.
მანამდე წამყვანი ქართული მედიასაშუალებები აცხადებდნენ, რომ ბიძინა ივანიშვილის უფროსი ვაჟი, 23 წლის უტა ივანიშვილი, რომელიც ამ ეტაპზე პარიზში ცხოვრობს, შესაძლოა, 2016 წლის საპარლამენტო არჩევნებში კოალიცია "ქართული ოცნების“ საარჩევნო სიას ჩაუდგეს სათავეში. „ქართული ოცნების“ დეპუტატის გია ვოლსკის განმარტებით, მმართველი კოალიცია ჯერ კიდევ 2012 წელს გეგმავდა უტა ივანიშვილის პოლიტიკაში ჩართვას, თუმცა, ასე არ მოხდა.
