თბილისი, 24 აგვისტო — Sputnik. ყაზახეთის დედაქალაქ ასტანაში 24 აგვისტოს ძიუდოში მსოფლიო ჩემპიონატი დაიწყო. საქართველოს ნაკრები, რომელიც ჩემპიონატის ერთ-ერთი ფავორიტია, 11 სპორტსმენითაა წარმოდგენილი. მამაკაცთა შორის ინდივიდუალურ შეჯიბრებში გამოვლენ:
• ამირან პაპინაშვილი (-60 კგ)
• ლაშა შავდათუაშვილი და ნუგზარ თათალაშვილი (-73 კგ)
• ავთო ჭრიკიშვილი და უშანგი მარგიანი (-81 კგ)
• ვალერი ლიპარტელიანი და ბექა ღვინიაშვილი (-90 კგ)
• ადამ ოქრუაშვილი და ლევან მათიაშვილი (+100 კგ).
ვაჟა მარგველაშვილი (-66კგ) გუნდურ პირველობაში იასპარეზებს.
ქალთა შორის საქართველოს ნაკრებს ესთერ სტამი წამოადგენს (-70 კგ).
სულ მსოფლიო პირველობაში 120 ქვეყნის 729 სპორტსმენი მიიღებს მონაწილეობას. მათგან 432 მამაკაცი, ხოლო 297 ქალია. მსოფლიო ჩემპიონატის ტრანსლაცია 160 ქვეყანაში განხორციელდება.
დღეს ასტანაში ჯილდოების ორი კომპლექტი გათამაშდება. ქალები 48 კგ-მდე წონით კატეგორიაში უძლიერესს გამოავლენენ, ხოლო მამაკაცები — 60 კგ-მდე წონით კატეგორიაში. ამ წონაში საქართველოს სახელით წინა მსოფლიო ჩემპიონატის ბრინჯაოს პრიზიორი ამირან პაპინაშვილი გამოვა. მისი მოწინააღმდეგე ლიბანელი დამიენ ზიადი იქნება.
