თბილისი, 24 აგვისტო — Sputnik. საფრანგეთის ჩემპიონატში საქართველოს ფეხბურთის ნაკრების კაპიტნის, ჯაბა კანკავას დებიუტი შედგა კლუბ „რეიმსის“ შემადგენლობაში, რომელიც „ნანტის“ წინააღმდეგ გასვლით მატჩს ატარებდა.
ქართველი ნახევარმცველი მოედანზე სასტარტო შემადგენლობაში გავიდა და მე-40 წუთზე პირველი გაფრთხილებაც მიიღო. შესვენების შემდეგ კანკავა კვლავ გავიდა მოედანზე, თუმცა 8 წუთის შემდეგ ის შეცვალეს.
„რეიმსი“ შეხვედრაში საკუთარ კარში მიღებული ერთადერთი გოლით დამარცხდა, რომელიც 77-ე წუთზე ემირ ლენჟანიმ გაიტანა.
ჩემპიონატში ჩატარებული სამი მატჩის შემდეგ „რეიმსი“ 6 ქულით მეექვსე ადგილზეა. 29 აგვისტოს კლუბი საკუთარ მოედანზე უმასპინძლებს „ლორიანს“.
მიმდინარე ზაფხულს ჯაბა კანკავამ ფრანგულ კლუბთან ოთხწლიან კონტრაქტს მოაწერა ხელი. მანამდე ის „დნეპრის“ ღირსებას იცავდა ბოლო რვა წლის განმავლობაში.
