თბილისი, 12აგვისტო— Sputnik. საქართველოს პრემიერ-მინისტრის ირაკლი ღარიბაშვილის ინიციატივით, დიდგორის ველის ინფრასტრუქტურა მთლიანად განახლდება, იუწყება მთავრობის მეთაურის პრეს-სამსახური ოთხშაბათს, 12 აგვისტოს.
ყოველ წელს, 12 აგვისტოს, საქართველოში დიდგორობას აღნიშნავენ, რომელიც ქვეყნის ისტორიაში ყველაზე ცნობილ ბრძოლასთან არის დაკავშირებული. ამ დღეს, 1121 წელს ქართველთა მეფე დავით აღმაშენებელმა თურქ-სელჩუკთა არმიას სძლია.
აღნიშნულ საკითხზე დავალება — „ყველაფერი ისე მოეწყოს, როგორც ამას საქართველოს დიდი მეფე იმსახურებს“ — უკვე მიიღო საქართველოს რეგიონალური განვითარებისა და ინფრასტრუქტურის მინისტრმა ნოდარ ჯავახიშვილმა.
გარდა ამისა, დიდგორობის ზეიმზე მყოფი პრემიერ-მინისტრი კიდევ ერთი ინიციატივით გამოვიდა — მან განათლებისა და მეცნიერების მინისტრს თამარ სანიკიძეს მითითება მისცა, რომ დიდგორობის აღნიშვნის დღესასწაულს ყოველწლიურად სკოლის მოსწავლეებიც დაესწრნონ. ღარიბაშვილის განმარტებით, მსგავს ღონისძიებებში მომავალი თაობის ჩართულობა მნიშვნელოვანია.
