თბილისი, 5 აგვისტო — Sputnik. ბიზნესმენმა და საქართველოს ყოფილი თავდაცვის მინისტრის ირაკლი ოქრუაშვილის მეგობარმა ქიბარ ხალვაშმა, თბილისის საქალაქო სასამართლოში სარჩელი შეიტანა, ტელეკომპანია „რუსთავი-2“-ს მფლობელობისაგან მისი წილის „უკანონო ამოღების“ თაობაზე. ამის შესახებ ჟურნალისტებს ქიბარ ხალვაშის ადვოკატმა პაატა სალიამ ოთხშაბათს, 5 აგვისტოს აცნობა.
2005 წელს ხალვაში ტელეკომპანია „რუსთავი-2“-ის 100% წილს ფლობდა. 2005 წლის 26 დეკემბერს, ქიბარ ხალვაშმა 22% კომპანია „საქცემენტს“ (ამჟამად „ჰაიდელბერგ ცემენტ ჯორჯია“) გადასცა. ამ კომპანიის ერთპიროვნული მმართველი საქართველოს საგარეო საქმეთა ყოფილი მინისტრის გელა ბეჟუაშვილის მამა რობერტ ბეჟუაშვილი იყო. 2006 წელს ხალვაშმა დარჩენილი 78% კომპანია „ჯეო-ტრანს“-ს გადასცა, რომელიც ბიზნესმენ ბიძინა ნიჟარაძეს ეკუთვნოდა.
„ბიზნესმენმა ქიბარ ხალვაშმა თბილისის საქალაქო სასამართლოში სარჩელი შეიტანა, რომელიც ტელეკომპანია „რუსთავი —2“-დან მისი წილის უკანონოდ ამოღებას ეხება. ის მოითხოვს, რომ უკანონოდ ამოღებული წილი მას დაუბრუნდეს“ — თქვა ადვოკატმა.
უახლოეს მომავალში მოხდებოდა „რუსთავი-2“-ს წილების კიდევ ერთი გადაფორმება, რაც გაართულებდა სამართლიანობის აღდგენისათვის ბრძოლას, ასკვნის ადვოკატი პაატა სალია.
ტელეკომპანია „რუსთავი-2“-ს აქციებმა არაერთი მფლობელი გამოიცვალა. ამჟამად ტელეკომპანიის აქციებს ფლობენ: გიორგი გეგეშიძე —10%, ლევან ყარამანაშვილი — 50% და გიორგი ყარამანაშვილი — 40%.
თავად ქიბარ ხალვაშმა საქართველო 2007 წელს დატოვა. იმავე წელს მისი ბიზნესი საქართველოში აუქციონზე გაიყიდა. ამ დროისათვის ხალვაში გერმანიაში ცხოვრობს.
