თბილისი, 30 ივლისი — Sputnik. ევროკავშირი ღრმა მწუხარებას გამოთქვამს, რომ გაეროს უშიშროების საბჭომ ვერ მიიღო რეზოლუცია უკრაინის თავზე ჩამოგდებულ ბოინგ MH-17-თან დაკავშირებით. ეს რეზოლუცია საერთაშორისო ტრიბუნალის შექმნასა და ტრაგედიაში დამნაშავეთა პასუხისგებაში მიცემას უზრუნველყოფდა, განაცხადა ფედერიკა მოგერინის ოფიციალურმა წარმომადგენელმა მაია კასიაჩიჩმა, — იუწყება რუსული საინფორმაციო სააგენტო „რია ნოვოსტი“.
„ჩვენ ძალინ ვწუხვართ, რომ გაეროს უშიშროების საბჭომ გუშინ რუსეთის ვეტოს გამო „მალაიზიის ავიახაზების“ რეისის ავიაკატასტროფაზე რეზოლუცია ვერ მიიღო. ეს რეზოლუცია დაადგენდა სავალდებულო და სანდო მექანიზმს იმათ პასუხისგებაში მისაცემად, ვინც ამ საშინელ ტრაგედიაშია დამნაშავე“, — უთხრა კასიაჩიჩმა ჟურნალისტებს ხუთშაბათს.
2014 წლის 17 ივლისს უკრაინის თავზე МН-17-ის ჩამოვარდნიდან ერთი წლის თავზე, 29 ივლისს, გაეროს უშიშროების საბჭომ განიხილა მთელი რიგი ქვეყნების ინიციატივა საერთაშორისო ტრიბუნალი დაარსების შესახებ იმ პირთა გასასამართლებლად, ვისაც ამ კატასტროფაში ბრალი მიუძღვის. რუსეთმა ამ ინიციატივას მხარი არ დაუჭირა, ხოლო ანგოლამ, ვენესუელამ და ჩინეთმა თავი შეიკავეს.
