თბილისი, 20 ივლისი —Sputnik. საბერძნეთის ბანკები ორშაბათს, არასაკმარის ლიკვიდურობასთან დაკავშირებული სამკვირიანი „არდადეგების“ შემდეგ გაიხსნა. ამის შესახებ რუსული საინფორმაციო სააგენტო „რია ნოვოსტი“ იუწყება.
სააგენტოს კორესპონდენტი ათენის ცენტრში რიგ საბანკო განყოფილებაში იმყოფებოდა, მისი განმარტებით, საფინანსო დაწესებულებების გახსნასთან დაკავშირებით არანაირი აჟიოტაჟი არ ყოფილა. ბანკის გაყოფილებაში, საბანკო ოპერატორებთან რიგებში, საშუალოდ, 15-20 ადამიანი იმყოფებოდა.
საბერძნეთის ბანკებმა მუშაობა 29 ივნისს, მას შემდეგ შეაჩერეს, რაც საერთაშორისო კრედიტორებთან შეთანხმების თაობაზე რეფერენდუმის ჩატარების შესახებ გამოცხადდა, ამას კი ანგარიშიდან თანხის მოხსნასთან დაკავშირებით აჟიოტაჟი მოჰყვა.
თავდაპირველად, ერთკვირიანი „არდადეგები“ გამოცხადდა, თუმცა ეს ვადა ოთხჯერ გაიზარდა.
ახალ კანონში ნათქვამია, რომ ბანკის კლიენტებს დღეში 60 ევროზე მეტი თანხის გატანა არ შეუძლიათ, მაგრამ თუ თანხა რამდენიმე დღის მანძილზე არ ყოფილა ანგარიშიდან მოხსნილი, შესაძლებელია ამ თანხის ერთდროულად — კვირაში 420 ევრომდე — გატანა.
