თბილისი, 8 ივლისი — Sputnik. ქართველი ბალერინა ანა ტურაზაშვილი, რომელიც მოსკოვის დიდ თეატრში ექვსი წლის წინ მიიღეს, ახლა სოლისტი გახდა, აღნიშნულია თეატრის ვებგვერდზე განთავსებულ განცხადებაში.
„სოლისტების კატეგორიაში გადაყვანილი არიან ანასტასია ვინოკური, ანგელინა კარპოვა, ანა ტურაზაშვილი და ალექსანდრ სმოლიანინოვი“, – ნათქვამია განცხადებაში.
ანა ტურაზაშვილი თბილისში დაიბადა. 1999 წელს იგი ვ. ჭაბუკიანის სახელობის თბილისის ქორეოგრაფიულ სასწავლებელში ჩაირიცხა, ხოლო 2004-2007 წლებში სწავლა მოსკოვის სახელმწიფო ქორეოგრაფიის აკადემიაში განაგრძო.
2007-2009 წლებში ტურაზაშვილი ზ. ფალიაშვილის სახელობის თბილისის ოპერისა და ბალეტის სახელმწიფო თეატრის დასში ცეკვავდა, ხოლო 2009 წელს დიდი თეატრის დასის ბალერინა გახდა.
