თბილისი, 2 ივნისი – Sputnik. ნატოს წევრი და პარტნიორი ქვეყნების შეიარაღებული ძალების მაღალჩინოსნები და ექსპერტები ნატოს სტრატეგიული სამხედრო პარტნიორობის ყოველწლიურ კონფერენციაში მიიღებენ მონაწილეობას, რომელიც თბილისში 8-10 ივნისს გაიმართება.
კონფერენციაზე, რომელშიც ნატოს წევრი და პარტნიორი ქვეყნების 80-ზე მეტი წარმომადგენელი მიიღებს მონაწილეობას, ტრანსფორმაციისა და სამომავლო გამოწვევების საკითხებზე იმსჯელებენ.
„კონფერენციის მიზანია ხელი შეუწყოს ტრანსატლანტიკური თანამეგობრობის ქვეყნებში ტრანსფორმაციის შესახებ აზრთა გაზიარებასა და ერთიანი ხედვის ჩამოყალიბებას“, – იუწყება საქართველოს თავდაცვის სამინისტროს პრეს–სამსახური სამშაბათს, 2 ივნისს.
ამასთან აღნიშნულია, რომ ნატოსთვის განსაკუთრებით მნიშვნელოვანია მჭიდრო ურთიერთობა განავითაროს არაწევრ სახელმწიფოებთან. „პარტნიორ ქვეყნებს კონფერენციაზე განსაკუთრებული ყურადღება ეთმობა“, – ნათქვამია განცხადებაში.
ფორუმის ორგანიზატორები არიან საქართველოს შეიარაღებული ძალები და ნატოს ტრანსფორმაციის გაერთიანებული სარდლობა.
