თბილისი, 29 მაისი — Sputnik. პარასკევს, 29 მაისს საქართველოს პარლამენტმა ლევან ბერძენიშვილის კანდიდატურა ევროინტეგრაციის კომიტეტის თავმჯდომარედ, ხოლო გელა სამხარაულის კანდიდატურა — აგრარულ საკითხთა კომიტეტის თავმჯდომარედ ხმათა უმრავლესობით დაამტკიცა.
უმრავლესობის ფრაქცია „ქართული ოცნება — რესპუბლიკელების“ წევრის — ლევან ბერძენიშვილის კანდიდატურას ხმა 97-მა დეპუტატმა მისცა, ხოლო უმრავლესობის მეორე წევრის — გელა სამხარაულის კანდიდატურას — 95-მა. სამხარაულმა თავის დროზე „თავისუფალი დემოკრატების“ ფრაქცია დატოვა, რომელიც ოპოზიციაში გადავიდა.
თანამდებობები ვაკანტური მას შემდეგ გახდა, რაც საქართველოს პარლამენტმა 8 მაისს თინათინ ხიდაშელს და გიგლა აგულაშვილს სადეპუტატო უფლებამოსილება შეუწყვიტა. ხიდაშელი ევროპასთან ინტეგრაციის კომიტეტს თავმჯდომარეობდა და თავდაცვის მინისტრი გახდა, ხოლო აგულაშვილი — საქართველოს პარლამენტის აგრარულ საკითხთა კომიტეტს. მან გარემოს დაცვის და ბუნებრივი რესურსების მინისტრის პოსტი დაიკავა.
სამხარაული და ბერძენიშვილი იმ კომიტეტების თავმჯდომარეების პირველი მოადგილეები იყვნენ, რომლებსაც პარასკევს სათავეში ჩაუდგნენ.
