თბილისი, 29 მაისი, — Sputnik. 29 მაისს ბათუმის საკრებულომ შავი ზღვის ამ კურორტის ღირსშესანიშნაობის — ანბანის კოშკის ესპანური კომპანიისათვის 20 წლიანი ვადით 1 (0.43$) ლარად სარგებლობაში გადაცემის გადაწყვეტილება მიიღო. ამის შესახებ ტელეკომპანია „იმედი“ იტყობინება.
„გამოჩნდა ინვესტორი რომელსაც ამ ქონებას 1 ლარად ვაძლევთ არა საკუთრებაში, არამედ სარგებლობის უფლებით, 20 წლის ვადით“ — განაცხადა ბათუმის საკრებულოს თავმჯდომარემ ირაკლი ჭეიშვილმა.
ეს გადაწყვეტილება საქართველოს მესამე პრეზიდენტის, მიხეილ სააკაშვილის პარტიაში — „ერთიან ნაციონალურ მოძრაობაში“ გააპროტესტეს.
„არავის, არც საკრებულოში, არც მერიაში არ შეუძლია გაგვცეს პასუხი კითხვაზე - რას წარმოადგენს კომპანია, რომელსაც ბათუმის რამდენიმე მილიონ ლარად ღირებულ მთავარ ობიექტს 1 ლარად ვაძლევთ“- განაცხადა საკრებულოს დეპუტატმა გიორგი კირთაძემ.
ალბერტო დომინგო კაბოს 130 მეტრიანი არქიტექტურული ქმნილება — ანბანის კოშკი, 2012 წელს აშენდა და მისი კონსტრუქცია დნმ-ს მოლეკულას წააგავს. კოშკზე ირგვლივ ქართული ალფავიტის 33 ასოა შემოხვეული.
