თბილისი, 6 მაისი –Sputnik. მიმართვას, რომელიც პრეზიდენტ მარგველაშვილს დღეს გადაეგზავნა, ხელს აწერს ჯონდი ბაღათურია – ”ქართული დასიდან”, სოსო შატბერაშვილი – ”მემარცხენეთა ალიანსიდან” და დავით თარხან-მოურავი ”საქართველოს პატრიოტთა ალიანსიდან”.
”ჩვენ, პოლიტიკური პარტიები, მოგმართავთ თქვენ, საქართველოს პრეზიდენტს, როგორც კონსტიტუციური წესრიგის გარანტს – წარუდგინეთ პარლამენტს მთავრობის ისეთი შემადგენლობა, რომელიც შეძლებს ქვეყანაში არსებული კრიზისის გადალახვას მას შემდეგ, რაც სიტუაციაში გაერკვევით, პრემიერთან პირისპირ შეხვედრისას კონსულტაციებს გაივლით და შეთანხმდებით”, – ნათქვამია მიმართვაში.
ერთობლივ განცხადებაში ასევე საუბარია იმაზეც, რომ მთავრობის ფორმირების საკითხზე მუშაობისას პრემიერ-მინისტრი წნეხის ქვეშ იყო.
”ქართულ საზოგადოებასა და პოლიტიკურ სპექტრში არსებობს საფუძვლიანი ეჭვი, რომ მთავრობის ახალი შემადგენლობის ფორმირების პროცესში, მინისტრთა კანდიდატურების შერჩევისას, პრემიერ-მინისტრი იყო ზეწოლის ქვეშ და ზეწოლას ახორციელებდა არაკონსტიტუციური, არაფორმალური სტატუსის მქონე პირი… ამით უხეშად დაირღვა საქართველოს კონსტიტუცია და სუვერენიტეტი”, – ნათქვამია დოკუმენტში.
