თბილისი, 15 დეკემბერი — Sputnik. ლონდონში კორონავირუსით ინფიცირების შემთხვევების მატების გამო ოთხშაბათს შეზღუდვების მკაცრი დონე ამოქმედდება, ამის შესახებ ორშაბათს დიდი ბრიტანეთის ჯანდაცვის მინისტრმა მეტ ჰენკოკმა პარლამენტში გამოსვლისას განაცხადა.
ქვეყანაში საყოველთაო „ლოკდაუნი“ 2 დეკემბერს დასრულდა. ამის შემდეგ დაწესდა შეზღუდვების საშუალო დონე, მაგრამ დედაქალაქში მაშინვე დაფიქსირდა COVID-19-ით დაავადებულთა ზრდა. გრინვიჩის რაიონში ყველა სკოლა დაიკეტა.
ამიტომ ახლა დედაქალაქი უფრო სერიოზულ შეზღუდვებს უბრუნდება – კაფეები და რესტორნები გატანის და მიტანის სერვისზე გადავლენ, ქომაგებს სტადიონებზე აღარ დაუშვებენ, დაიკეტება თეატრები. პარკებში ამოქმედდება „ექვსის წესი“ – იქ ერთად შეკრება შეუძლია მაქსიმუმ ექვს პირს, სოციალური დისტანციის დაცვით.
მკაცრ „ლოკდაუნამდე“ საქმე ჯერ არ მისულა, ამიტომ მაღაზიები და სილამაზის სალონები იმუშავებს.