თბილისი, 3 დეკემბერი — Sputnik. იაპონია აპირებს სრულად შეწყვიტოს ბენზინზე მომუშავე ავტომობილების გაყიდვა 2030 წლიდან, იუწყება ახალი ამბების სააგენტო „კიოდო“.
გავრცელებული ინფორმაციით, აღნიშნული საკითხის შეთანხმებაზე ამ დროისათვის უკვე მუშაობს ქვეყნის ეკონომიკის, მრეწველობისა და ვაჭრობის სამინისტრო.
სააგენტოს ცნობით, 2030 წლიდან გასაყიდად დაშვებულ ყველა ავტომობილს უნდა ჰქონდეს ჰიბრიდული, ელექტრო ან წყალბადის ძრავი.
როგორც ირკვევა, ამ გადაწყვეტილებას ბიძგი იაპონიის პრემიერ-მინისტრის იოსიჰიდე სუგას განცხადებამ მისცა, რომელიც 2050 წლისთვის ქვეყანაში სათბური გაზების გამოფრქვევის ნულამდე დაყვანას შეეხებოდა.
ეკონომიკის, მრეწველობისა და ვაჭრობის სამინისტროში მიაჩნიათ, რომ ბენზინის ძრავებზე უარის თქმა მწარმოებლებს უბიძგებს, კიდევ უფრო ინტენსიურად იმუშაონ ელექტროძრავების შექმნა–დახვეწაზე.
ვარაუდობენ, რომ ამ კუთხით კონკრეტული მიმართულებები წლის ბოლომდე ჩამოყალიბდება.