თბილისი, 16 ნოემბერი — Sputnik. აშშ-ის ჯორჯიის შტატში საარჩევნო ბიულეტენების გადათვლა, რაც ახლა მიმდინარეობს, ვერ მოახდენს გავლენას საპრეზიდენტო არჩევნების შედეგებზე, რომელთა თანახმად შტატში ჯო ბაიდენმა გაიმარჯვა, განაცხადა დემოკრატიული პარტიის გარდამავალი გუნდის წევრმა პატრიკ მურმა.
როგორც მან აღნიშნა, უკვე ახლა შეიძლება ითქვას, რომ ჯორჯიაში მიმდინარე ხმების გადათვლა „პრაქტიკულად არანაირად“ არ ისახება საფინალო შედეგებზე.
ამასთან, მურმა განაცხადა, რომ დემოკრატი კანდიდატის შტაბის წარმომადგენლებს არ აქვთ საფუძველი ივარაუდონ, რომ ჯორჯიაში კენჭისყრისას რაიმე დარღვევებს ჰქონდა ადგილი.
აღსანიშნავია, რომ ჯორჯია (16 ელექტორალური ხმა) იმ მერყევ შტატთა ჩამონათვალს განეკუთვნება, სადაც ბოლო მომენტამდე არ იყო ნათელი, რომელი კანდიდატისკენ იხრებოდა მოსახლეობის უმრავლესობა. ბოლოს ამ შტატში დემოკრატმა კანდიდატმა 1992 წელს გაიმარჯვა.
მინიმალური სხვაობა შედეგებში: ჯორჯიის შტატში ბიულეტენებს ხელით გადაითვლიან>>
არჩევნების შემდგომ პირველ დღეებში ჯორჯიაში დონალდ ტრამპი ლიდერობდა, თუმცა ბიულეტენების დათვლის კვალდაკვალ ჯო ბაიდენსა და მას შორის სხვაობა შემცირდა. 6 ნოემბერს კი დემოკრატი კანდიდატი დაწინაურდა. Fox New-ის ინფორმაციით, ამ დროისათვის შტატში ბაიდენს ხმების 49,5% აქვს მიღებული, ხოლო დონალდ ტრამპს — 49,2%, ანუ 14 122 ხმით ნაკლები.
გასულ კვირაში შტატის ხელისუფლებამ ხმების გადათვლის გადაწყვეტილება სწორედ იმის გამო მიიღო, რომ კანდიდატებისთვის მიცემული ხმები რაოდენობით მცირედ განსხვავდებოდა ერთმანეთისგან.
აღსანიშნავია, რომ ჯორჯიაში კენჭისყრის ოფიციალური შედეგების დაჯამების ვადა 20 ნოემბერს იწურება.
