თბილისი, 27 ოქტომბერი — Sputnik. ახალი ტიპის კორონავირუსი SARS-CoV-2, რომელიც დაავადება COVID-19-ს იწვევს, სტაბილურობას ინარჩუნებს და მის სახიფათო მუტაციაზე არაფერი მიანიშნებს, განაცხადეს ჯანდაცვის მსოფლიო ორგანიზაციის ექსპერტებმა ჟენევაში გამართულ მედია-ბრიფინგზე.
Media briefing on #COVID19 with @DrTedros https://t.co/ums9SrgyGO
— World Health Organization (WHO) (@WHO) October 26, 2020
მათი თქმით, ჯერჯერობით ასევე არ არსებობს არანაირი დასტური იმისა, რომ ვირუსი უფრო მომაკვდინებელი გახდა.
„თუ ვირუსი გამოავლენს ისეთ მუტაციას, რომელიც ტესტირების მეშვეობით მისი დიაგნოსტირების შესაძლებლობას შეცვლის, უკიდურესად მნიშვნელოვანია ვაქცინისა და წამლის არსებობა. მაგრამ ამ დროისათვის ვირუსი სტაბილურია. აქვს ნორმალური მუტაციები და გვაქვს მისი დიაგნოსტირებისა და თერაპევტული მკურნალობის საშუალებები“, — განაცხადა ჯანმოს წარმომადგენელმა მარია ვან კერკჰოვემ.
ექსპერტის თქმით, ჯანმომ პანდემიის დაწყების მომენტიდანვე აამოქმედა სპეციალური ჯგუფი, რომელიც ახალი კორონავირუსის მუტაციებს აკვირდება.
ის ფაქტი, რომ SARS-CoV-2-ს ახალი საშიში და უფრო სასიკვდილო მუტაციები არ გამოუვლენია, ასევე დაადასტურა ჯანმოს საგანგებო ვითარებათა პროგრამის დირექტორმა მაიკლ რაიანმა.
- „ჩვენ გამუდმებით ვაკვირდებით ვირუსის ცვლილებებს... არ არსებობს არანაირი ნიშანი იმისა, რომ ვირუსი უფრო ადვილად გადამდები ან უფრო მომაკვდინებელი გახდა“, — აღნიშნა მან.
ამ დროისათვის მსოფლიოში ახალი კორონავირუსით ინფიცირებულთა საერთო რაოდენობა 43 490 206 კაცს შეადგენს, რომელთაგან 1 159 425 გარდაიცვალა.