თბილისი, 26 სექტემბერი ― Sputnik. უკრაინაში, ხარკოვის მახლობლად მდებარე ჩუგუევში სამხედრო-სამგზავრო თვითმფრინავი Ан-26 ჩამოვარდა და აფეთქდა, იუწყება უკრაინის საგანგებო სიტუაციების სახელმწიფო სამსახური.
კატასტროფის მიზეზი, სავარაუდოდ, თვითმფრინავის მარცხენა ძრავის გაჩერება იყო.
გავრცელებული ინფორმაციით, თვითმფრინავის ბორტზე 27 მგზავრი იმყოფებოდა ― ხარკოვის საჰაერო ძალების უნივერსიტეტის 20 კურსანტი და 7 ოფიცერი.
„აეროდრომის დისპეტჩერის ინფორმაციით, ბორტზე 27 ადამიანი იმყოფებოდა (ერთი კურსანტი ფრენის შესასრულებლად არ დაუშვეს). ნაპოვნია 22 დაღუპულის ცხედარი, ორი დაშავებულია, ხოლო სამის ძებნა გრძელდება“, ― ნათქვამია უწყების პრესსამსახურის განცხადებაში.
რეგიონის ხელისუფლებამ 26 სექტემბერი გლოვის დღედ გამოაცხადა და მოუწოდა ორგანიზაციებს, გააუქმონ გასართობი და სპორტული ღონისძიებები.