თბილისი, 10 აპრილი – Sputnik. დუბაის (არაბთა გაერთიანებული საამიროები) მკვიდრმა ორცოლიანმა მამაკაცმა პოლიციას პირდაპირ რადიოეთერში სთხოვა, კარანტინის პირობებში სახლიდან გასვლისა და მეორე ცოლის მონახულების უფლება მიეცათ, იუწყება Gulf Today.
გავრცელებული ინფორმაციით, დუბაის პოლიციის თანამშრომლები რადიოს პირდაპირი ეთერით მოქალაქეების კითხვებს პასუხობდნენ და განმარტებებს აძლევდნენ მათ იზოლაციის წესებთან დაკავშირებით.
ერთ-ერთმა მსმენელმა მათ განუცხადა, რომ ჰყავს ორი ცოლი, მაგრამ ერთთან ცხოვრობს, მეორეს კი დროგამოშვებით ნახულობს ხოლმე, თუმცა, შეზღუდვების გამო, ახლა მასთან სტუმრობას ვეღარ ახერხებს. მამაკაცმა პოლიციას სთხოვა, დაეშვათ გამონაკლისი და მეორე მეუღლის მონახულების ნებართვა მიეცათ.
სამართალდამცველები გაახალისა ორცოლიანი მოქალაქის გასაჭირმა. საგზაო მოძრაობის დეპარტამენტის შეფმა კი მას ურჩია, პოზიტიურად შეეხედა არსებული ვითარებისთვის და აღექვა ეს, როგორც კარგი საბაბი მეორე ცოლისგან დროებით დასასვენებლად.
ჯონს ჰოპკინსის უნივერსიტეტის სპეციალური პროექტის მონაცემებით, არაბთა გაერთიანებულ საამიროებში ახალი კორონავირუსით 2 990 ადამიანია ინფიცირებული. აქედან გარდაცვლილია 14 და განკურნებულია 168 პაციენტი.
