თბილისი, 19 მარტი — Sputnik. ჯონ ჰოპკინსის უნივერსიტეტის სპეციალური პროექტის მონაცემებით, ახალი ტიპის კორონავირუსი COVID-19-ით ინფიცირებულთა რაოდენობამ მსოფლიოს მასშტაბით 218 815 კაცს მიაღწია, აქედან გარდაცვლილია 8 810 და განკურნებულია 84 114 ადამიანი.
ინფიცირებულთა რაოდენობით პირველ პოზიციაზე კვლავ ჩინეთია (81 138 კაცი), სადაც ამ დროისთვის ეპიდემიის პიკი უკვე გადავლილია და დღე-ღამის განმავლობაში ახალი დასნებოვნების მცირე შემთხვევებიღა ფიქსირდება. სხვა ქვეყნების ჩამონათვალი, რომლებშიც ახალი ტიპის კორონავირუსით დაავადებულთა რიცხვმა ათასს გადააჭარბა, ასეთია: იტალია – 35 713, ირანი — 17 361, ესპანეთი — 14 769, გერმანია — 12 327, აშშ — 9 415, საფრანგეთი — 9 054, სამხრეთ კორეა — 8 565, შვეიცარია — 3 067, დიდი ბრიტანეთი — 2 644, ნიდერლანდები — 2 056, ავსტრია — 1 646, ნორვეგია — 1 591, ბელგია — 1 486, შვედეთი — 1 301, დანია — 1 015 ადამიანი.
COVID-19-თან დაკავშირებული და მისით გამოწვეული ძირითადი მოვლენები, რომლებიც 18–19 მარტის შუაღამიდან ამ დრომდე მოხდა, ასე გამოიყურება:
- თურქეთის პრეზიდენტმა რეჯეფ თაიიფ ერდოღანმა განაცხადა, რომ „დასავლეთის ქვეყნებმა ბედის ანაბარა მიატოვეს ეპიდემიით დაზარალებულები და მოქმედებენ პრინციპით „ვისაც შეუძლია, გადარჩეს“;
- აშშ-სა და კანადას შორის გადაადგილება შეიზღუდება, საზღვარს ადამიანები მხოლოდ უკიდურესი აუცილებლობის შემთხვევაში გადაკვეთენ. შეზღუდვები არ შეეხება სავაჭრო ურთიერთობასა და ტვირთების გადაზიდვას;
- იტალიური საფეხბურთო კლუბი „სამპდორიას“ ნახევარმცველმა იაკუბ იანკტომ განაცხადა, რომ კლუბში კორონავირუსით უკვე 15 ადამიანია ინფიცირებული;
- ინდოეთის შტატ კერალას პოლიციამ სოციალურ ქსელში გამოაქვეყნა ვიდეორგოლი, რომელშიც სამართალდამცველები ცეკვით ასწავლიან საზოგადოებას, როგორ უნდა დაიბანონ ხელები COVID-19-ის პანდემიის პირობებში;
- მადრიდის „რეალის“ ყოფილი პრეზიდენტის ლორენსო სანსას ჯანმრთელობის მდგომარეობა, რომელიც კორონავირუსითაა ინფიცირებული, დამძიმდა. ამის შესახებ მისი ვაჟი ლორენსო სანსა–უმცროსი აცხადებს;
- ესპანეთის საგარეო საქმეთა სამინისტრომ უარყო გავრცელებული ინფორმაცია, თითქოს 24 მარტიდან ქვეყნის ყველა სასტუმრო დაიკეტება და ესპანეთში ჩარჩენილ ტურისტებს პრობლემები შეექმნებათ;
- ესტონეთის ჯანმრთელობის დეპარტამენტში განაცხადეს, რომ ქვეყანაში ახალი ტიპის კორონავირუსით ინფიცირებულთა (258 კაცი) ნახევარზე მეტი 30–49 წლის ადამიანები არიან;
- აშშ-ის პრეზიდენტი დონალდ ტრამპი სამედიცინო პერსონალს შეხვდა და მადლობა გადაუხადა მათ COVID-19-თან „დაუღლელი ბრძოლისთვის“;
- კორონავირუსთან ბრძოლის საკითხებზე მსჯელობისას ნიდერლანდების ჯანდაცვის მინისტრმა ბრუნო ბრიოინსმა მოულოდნელად გონება დაკარგა და წაიქცა;
VIDEO — Dutch Minister for Medical Care Bruno Bruins collapses during parliamentary session, reportedly due to overwork as Netherlands grapples with coronavirus outbreak pic.twitter.com/uG2nAZQ4NF
— DAILY SABAH (@DailySabah) March 18, 2020
- აშშ-ში კიდევ ოთხ — ნიუ-იორკის, პენსილვანიის, კონეკტიკუტისა და ნიუ-ჯერსის შტატებში დროებით დაიკეტება ყველა გადახურული სავაჭრო და გასართობი ცენტრი;
- ნიუ-იორკის საფონდო ბირჟა ორშაბათიდან ვაჭრობის ყველა დარბაზს დაკეტავს და ელექტრონულ ვაჭრობაზე გადავა;
- კორონავირუსის გამო ლონდონში მეტროს 40 სადგური დაიკეტება, ამასთან, შეიზღუდება ავტობუსების მარშრუტების რაოდენობაც;
- აშშ-ის კონგრესში COVID-19-ით ინფიცირების ორი შემთხვევა გამოვლინდა. ეს კონგრესმენები არიან ბენ მაკადამსი და მამრიო დიას ბალარტი;
- იტალია ჯერჯერობით არ გეგმავს კორონავირუსთან ბრძოლის ზომების უფრო მეტად გამკაცრებას, ქვეყნის მთავრობა აცხადებს, რომ პიკი ჯერ არ დამდგარა და გატარებული ღონისძიებების პირველ შედეგებს ორიოდ კვირაში ელოდება;
- აშშ-ის ფინანსთა სამინისტრომ წამოაყენა წინადადება, კორონავირუსთან დაკავშირებით გამოიყოს 500 მლრდ დოლარი ამერიკელებისთვის ორ რაუნდად დასარიგებლად. სავარაუდოდ, თითოეულ ადამიანზე გასაცემი თანხის რაოდენობა მისი შემოსავლის მიხედვით განისაზღვრება;
- საჰაერო სივრის საერთაშორისო ასოციაციაში (IATA) განაცხადეს, რომ ჰაერი თვითმფრინავებში უფრო სუფთაა და უსაფრთხო, ვიდრე დედამიწაზე არსებულ ბევრ დაწესებულებაში;
- ეუთოს წარმომადგენლობა ყარაბაღის კონფლიქტის ზონაში მონიტორინგს დროებით აჩერებს;
- ტოკიოს გუბერნატორის თქმით, 2020 წლის ოლიმპიური თამაშების გადადების ან მაყურებლის გარეშე ჩატარების საკითხი ჯერჯერობით არ განიხილება;
- მოსკოვში კორონავირუსის გამო კომენდანტის საათის გამოცხადების შესახებ გავრცელებული ინფორმაცია ყალბი გამოდგა...