02:21 28 იანვარი 2020
პირდაპირი ეთერი
  • EUR3.1914
  • 100 RUB4.6313
  • USD2.8944
მსოფლიოში
მოკლე ბმულის მიღება
მსოფლიო დღეს (999)
70 0 0

აღმოსავლეთმცოდნეობის ექსპერტს მიაჩნია, რომ დონალდ ტრამპს ნებისმიერ დროს შეუძლია ერთპიროვნული გადაწყვეტილების მიღება

თბილისი, 7 იანვარი — Sputnik. აშშ-ის არმიის გაყვანას ერაყიდან პრეზიდენტ დონალდ ტრამპის იმპულსურმა ხასიათმა შეიძლება შეუწყოს ხელი, მიაჩნია რუსეთის აღმოსავლეთმცოდნეობის ინსტიტუტის ექსპერტ ვლადიმირ სოტნიკოვს. 

მანამდე მედიით გავრცელდა ერაყში აშშ-ის სამხედრო ძალების სარდლის, ბრიგადის გენერალ უილიამ სილის წერილი, რომელშიც ის, ადგილობრივი ხელისუფლების მოთხოვნის საფუძველზე, ქვეყნიდან ამერიკული ჯარების გაყვანის დაწყებაზე საუბრობად. თუმცა მოგვიანებით აშშ-ის შეიარაღებული ძალების შტაბების მეთაურთა გაერთიანებული კომიტეტის თავმჯდომარემ, გენერალმა მარკ მილიმ წერილს შეცდომა უწოდა.  

ექსპერტ სოტნიკოვის აზრით, დონალდ ტრამპს ნებისმიერ დროს შეუძლია მოულოდნელი გადაწყვეტილების ერთპიროვნულად მიღება. 

„ტრამპი იმპულსური გადაწყვეტილებების კაცია. მან თეთრ სახლში უახლოეს მრჩევლებსაც კი არ შეატყობინა და ერთპიროვნულად მიიღო გენერალ სულეიმანის განადგურების გადაწყვეტილება.  ვფიქრობ, რაღაც მომენტში მას შეუძლია სხვა იმპულსური გადაწყვეტილების მიღება და განაცხადოს, რომ ერაყიდან ამერიკული ჯარები გაჰყავს“, — განაცხადა ექსპერტმა.  

სოტნიკოვის აზრით, ერაყის ხელისუფლებამ ქვეყნიდამ აშშ-ის არმიის გაყვანა იმის გამო მოითხოვა, რომ არ სურს გახდეს ამერიკისა და ირანის კონფლიქტის არენა.  

აშშ-სა და ირანს შორის ურთიერთობა ბოლო პერიოდში განსაკუთრებით გამწვავდა. დეკემბერში შეერთებულმა შტატებმა ერაყსა და სირიაში შიიტური

დაჯგუფება „ქათაიბ ჰესბოლას“ ობიექტებს შეუტია. პენტაგონში განმარტეს, რომ ეს იყო პასუხი დაჯგუფების თავდასხმაზე ერაყში განთავსებულ ამერიკულ ბაზაზე, რა დროსაც დაიღუპა ამერიკის ერთი მოქალაქე და ასევე დაიჭრა ოთხი სამხედრო. ამის შემდეგ უკმაყოფილო შიიტებმა ბაღდადში მდებარე აშშ-ის საელჩოში შეჭრა სცადეს, რის პასუხადაც შეერთებულმა შტატებმა ირანელ გენერალ სულეიმანის წინააღმდეგ ოპერაცია განახორციელა.

შაბათს პრეზიდენტმა დონალდ ტრამპმა დაწერა, რომ აშშ-ს მიზანში ჰყავს ამოღებული ირანის 52 ობიექტი, მათ შორის, კულტურული მემკვიდრეობის ძეგლები. სხვადასხვა ქვეყნების პოლიტიკოსებმა და ექსპერტებმა განაცხადეს, რომ მსგავს ობიექტებზე შეტევას საერთაშორისო სამართლის ნორმები კრძალავს. მოგვიანებით სახელმწიფო მდივანმა მაიკ პომპეომ განმარტა, რომ აშშ „კანონის მიხედვით“ იმოქმედებს.

ბაღდადმა თავის აეროპორტზე ამერიკელთა შეტევა აშშ-ის ბაზების ერაყში განთავსების პირობების დარღვევად შეაფასა, რის შემდეგაც ერაყის პარლამენტმა ხელისუფლებისგან ქვეყნიდან ამერიკული ჯარების გაყვანა მოითხოვა. ამის პასუხად დონალდ ტრამპი ერაყს „ძალიან სერიოზული“ სანქციებით დაემუქრა, რომლებთან შედარებითაც „ანტიირანული სანქციები წვრილმანად გამოჩნდება“.

ამასთან ტრამპმა ხაზი გაუსვა, რომ არ აპირებს ერაყიდან ამერიკული ჯარების გაყვანას მანამ, სანამ ქვეყანა ამერიკული ავიაბაზის აშენების საფასურს არ გადაიხდის.

თემები:
მსოფლიო დღეს (999)

მთავარი თემები