თბილისი, 31 დეკემბერი — Sputnik. ჩინეთის ქალაქ უჰანში განუწყვეტლად ვლინდება უცნობი წარმოშობის პნევმონიის შემთხვევები, რის გამოც ქალაქის ხელისუფლებამ დაავალა სამედიცინო დაწესებულებებს, აწარმოონ სტატისტიკა და დაუყოვნებლივ აცნობონ ჯანდაცვის კომიტეტს თითოეული შემთხვევის შესახებ.
აღსანიშნავია, რომ ქალაქში უკვე ჩავიდნენ ჩინეთის ჯანდაცვის საკითხთა სახელმწიფო სპეციალისტები.
გავრცელებული ინფორმაციით, შემოწმებით დადგინდა, რომ დაავადებამ თავდაპირველად ზღვის პროდუქტების ბაზარზე იფეთქა. ამ დროისათვის სპეციალისტები ცდილობენ დაადგინონ, რომელ სახეობას განეკუთვნება გავრცელებული დაავადება. ადგილზე უკვე ჩატარდა სადეზინფექციო სამუშაოები, ხოლო ავადმყოფებს იზოლირებულად მკურნალობენ.
არსებული მონაცემებით, დეკემბერში უჰანში ვირუსული პნევმონიის 27 შემთხვევა დაფიქსირდა. მათგან შვიდი ადამიანი უკიდურესად მძიმე მდგომარეობაში იმყოფება, ორი კი უკეთაა და უახლოეს დღეებში გამოეწერებიან საავადმყოფოდან.
ამის პარალელურად მოსახლეობაში ვრცელდება ხმები, რომ ეს შესაძლოა SARS-ი (მწვავე მძიმე რესპირატორული სინდრომი) იყოს, თუმცა ხელისუფლება მოუწოდებს მოსახლეობას, არ აჰყვნენ პანიკას.
