თბილისი, 9 ოქტომბერი — Sputnik. რუსეთში მოღვაწე ცნობილი ქართველი მომღერლის ვალერი მელაძის 26 წლის ქალიშვილი ინგა მაროკოელ ფინანსისტ ნური ვერგეზეს გაჰყვა ცოლად.
ინგამ მომავალი მეუღლე ათი წლის წინ დიდ ბრიტანეთში, კემბრიჯის სკოლა King's Ely-ში სწავლისას გაიცნო. ახალგაზრდებმა ოქსფორდის უნივერსიტეტში ერთად ჩააბარეს, ხოლო 2015 წელს, როდესაც ნური ჟურნალისტად მუშაობდა ტელეარხ „ალ-ჯაზირაზე", წყვილმა შეუღლება გადაწყვიტა.
2017 წლის იანვარში შეყვარებულებმა ხელი კემბრიჯში მოაწერეს. თუმცა, რამდენადაც ნურის, რომელიც დიდ ბრიტანეთშია დაბადებული, მაროკოული ფესვები აქვს, წყვილმა დიდებული ქორწილის გამართვა მარაკეშში გადაწყვიტა.
ზეიმი ერთ-ერთ ხუთვარსკვლავიან სასტუმროში შედგა. 100 სტუმარზე გათვლილი საქორწინო ცერემონია ზეთისხილის ხეების ბაღში გაიმართა.
„მე შენთან ერთად გავიყოფ ჩემ სულს და დარჩენილ ცხოვრებას", — წარმოთქვეს ახალგაზრდებმა საქორწინო ფიცის დროს.
პატარძლის მეჯვარეები იყვნენ ინგას დები — სოფია და არინა, პატარძლის მამამ ვალერი მელაძემ კი ქალიშვილი საკურთხეველთან მიიყვანა და სტუმრებისთვის იმღერა.
ინგა მელაძის ქორწილის ფოტოები Instagram-ზე გაიზიარა ქართული ბრენდ More Is Love-ის დამაარსებელმა ნინო ელიავამაც.
„ნური და ინგა, ყველა თქვენი ოცნება და იმედები აგსრულებოდეთ", — წერს ელიავა საკუთარ ბლოგში.
