თბილისი, 21 დეკემბერი — Sputnik. გოგრა ერთ-ერთი ყველაზე ჯანსაღი ბოსტნეულია, რომლის ბიოლოგიურად აქტიური ნივთიერებები „ცუდი ქოლესტერინის“ გამოდევნას უზრუნველყოფს, აუმჯობესებს წყალ-მარილოვან ბალანსს და გულის შეუფერხებელ მუშაობას, წერს დიეტოლოგი სვეტლანა ფუსი საკუთარ ინსტაგრამ-გვერდზე.
მისი თქმით, გოგრა სასარგებლო გავლენას ახდენს მხედველობის ხარისხზე და, უფრო მეტიც, თრგუნავს კიბოს უჯრედების ზრდას.
„გოგრის ყვითელ-ნარინჯისფერი ჯიშები, ბეტა-კაროტინის შემცველობით, სტაფილოსთანაა გათანაბრებული. ბეტა-კაროტინი, გარდაიქმნება რა ორგანიზმში A ვიტამინად, არა მარტო აკონტროლებს ზრდის პროცესებს, ორგანიზმის განვითარებას, სათანადო დონეზე ინარჩუნებს მხედველობასა და იმუნურ რეაქციებს, არამედ საუკეთესო ბუნებრივი ანტიოქსიდანტიცაა, რომელიც ორგანიზმს გარემოს აგრესიული ზემოქმედებისგან იცავს. რაც მთავარია, აფერხებს უჯრედების ავთვისებიანად გარდაქმნას“, — ამბობს სვეტლანა ფუსი.
გარდა ამისა, ბოსტნეულში შედის დიდი რაოდენობით რკინა და თუთია, სპილენძისა და ფოსფორის მარილები, ასევე პექტინური ნივთიერებები, რომლებიც ყაბზობის (გაუვალობის) დროს ნაწლავების მუშაობას აუმჯობესებს.