თბილისი, 16 დეკემბერი — Sputnik. კუჭის წვენის დაბალი მჟავიანობის მქონე ადამიანებმა ლიმონიანი წყალი უნდა სვან, აცხადებს ენდოკრინოლოგი ეკატერინა იანგი და განმარტავს, რატომაა ამის გაკეთება საჭირო.
მისი თქმით, ჭიქა თბილ წყალში ჩამატებული ერთი ჩაის კოვზი ლიმონის წვენი (აუცილებლად ჭამამდე 20-30 წუთით ადრე) ასტიმულირებს კუჭის გარსის უჯრედებს მარილმჟავას გამოსამუშავებლად, რაც აუცილებელია საკვების ხარისხიანი მონელებისა და საჭმლის მომნელებელი ფერმენტების წარმოებისთვის.
სპეციალისტმა ხაზგასმით აღნიშნა, რომ ცივი ან ყინულიანი წყლის გამოყენება რეკომენდებული არ არის.
ექიმი იანგი ასევე გვაფრთხილებს, რომ მჟავე სასმელებმა შეიძლება კბილის მინანქარი დააზიანოს, ამიტომ მათი დალევა საწრუპის საშუალებითაა სასურველი.
„ლიმონი ყველაზე მარტივი, იაფი და გავრცელებული ვარიანტია. შეგიძლიათ ის ჩაანაცვლოთ ლაიმის ან გრეიპფრუტის წვენით. გამოდგება ვაშლის, ჟოლოს ან ბროწეულის ძმარიც (ერთი-ორი ჩაის კოვზი ერთ ჭიქა წყალზე). ასევე შეგიძლიათ გამოიყენოთ მჟავე კენკრის წვენი: ქაცვის, თეთრი ან წითელი მოცხარის, შტოშისა და წითელი მოცვისა“, — წერს ენდოკრინოლოგი საკუთარ ინსტაგრამ-გვერდზე.
ამასთან სპეციალისტი ხაზს უსვამს, რომ ლიმონიანი წყალი არ უნდა დალიონ გასტრიტის, გასტროდუოდენიტის, თორმეტგოჯა ნაწლავის წყლულის მქონე ადამიანებმა გამწვავების სტადიაში და ინდივიდუალური აუტანლობის შემთხვევაში.
