თბილისი, 13 ოქტომბერი — Sputnik. ჭუჭყიანი ფანჯრები ჯანმრთელობისთვის სერიოზული პრობლემების მიზეზი შეიძლება გახდეს, განაცხადა რადიო Sputnik-თან ინტერვიუში ეკოლოგ-ექსპერტმა ანტონ იასტრებცევმა.
მისი თქმით, ფანჯრების სისუფთავის შენარჩუნება მნიშვნელოვანია არა მხოლოდ წესრიგის დასაცავად, არამედ ჯანმრთელობისთვისაც. რაც უფრო კარგად არის ოთახი განათებული, მით მეტია მასში ბუნებრივი სინათლე და მით უფრო კომფორტულად გრძნობს ადამიანი თავს.
ექსპერტი ამბობს, რომ ძველი სახლების საკუჭნაოებს, ტუალეტებსა და სააბაზანოებსაც კი სწორედ ამიტომ ჰქონდა ფანჯრები. იმთავითვე მიიჩნეოდა, რომ მზის სინათლე შენობის დეზინფექციას ახდენს.
„თუმცა საქმე არა დეზინფექციაში, არამედ ინსოლაციაშია, რადგან რაც უფრო ნათელია ოთახი, მით უკეთ გრძნობს თავს ადამიანი. თუ ფანჯრები დაბინძურებულია, ოთახში ნაკლები შუქი აღწევს, რაც საკმაოდ სერიოზულად აისახება ადამიანზე“, — ამბობს ექსპერტი.
უფრო მეტიც, იასტრებცევის თქმით, შავი ჭუჭყი, რომელიც ფანჯრებზე გროვდება, შეიძლება ძალიან საშიშიც კი იყოს.
„ჭუჭყი ჩარჩოდან, მინიდან, ფანჯრის რაფებიდანაც უნდა ჩამორეცხოთ. შავი ჭუჭყი არის ის, რაც ჯერ კიდევ არ მოხვედრილა ოთახში და თუ მას არ მოაშორებთ, რომელიც, სხვათა შორის, ჭვარტლსა და კანცეროგენულ ნივთიერებებს შეიცავს, შეიძლება ქარმა ოთახში შემოიტანოს და ფილტვებში მოხვდეს“, — განმარტა ეკოლოგმა.
ექსპერტი გვირჩევს, ფანჯრები წელიწადში ორჯერ მაინც გავწმინდოთ. ეს განსაკუთრებით რეკომენდებულია მათთვის, ვისაც ალერგია აქვს.
სახალისო ჯადოქრობა: როგორ მოვიზიდოთ წარმატება და ბედნიერება ფანჯრის მეშვეობით>>
„ზაფხულსა და ზამთარში მტვრის შემადგენლობა განსხვავებულია. ზაფხულში, ძირითადად, ეს არის მტვერი, რომლის მიმართაც ბევრი ადამიანი ალერგიულია — ალვის ბუსუსები და სხვადასხვა მცენარეული წარმოშობის ჭუჭყი; ზამთარში კი ჭვარტლი და ქლორიდები უფრო გროვდება. საჭიროა მისი ჩამორეცხვა როგორც ზაფხულში, ისე ზამთარში“, — ამბობს ანტონ იასტრებცევი.
მისი თქმით, უკეთესია, თუ ფანჯრებს სპეციალური პრეპარატებით გაწმენდთ.
