თბილისი, 4 დეკემბერი – Sputnik. საქართველოს ფეხბურთის ახალგაზრდული ნაკრები (U-19) 2020 წლის ევროპის ჩემპიონატის ელიტ-რაუნდში რუსეთის ნაკრებს შეხვდება, ნათქვამია საქართველოს ფეხბურთის ფედერაციის ვებ–გვერდზე გავრცელებულ განცხადებაში.
3 დეკემბერს უეფას შტაბ–ბინაში ევრო–2020-ის ჩემპიონატის ელიტ-რაუნდისა და ჭაბუკთა ნაკრებებს (U-19 და U-17) შორის ევრო–2021-ის ჩემპიონატების პირველი შესარჩევი რაუნდების წილისყრები გაიმართა.
რამაზ სვანიძის გუნდი (U-19) საკმაოდ ძლიერ მოწინააღმდეგეებს – შოტლანდიის, საფრანგეთისა და რუსეთის გუნდებს შეხვდება. სამივე მატჩი საფრანგეთში 25, 28 და 31 მარტს ჩატარდება.
რაც შეეხება ჭაბუკთა ნაკრებს (U-17), გიორგი ჭითაურის გუნდი ბელგიის, ინგლისისა და რუმინეთის გუნდებს დაუპირისპირდება. ელიტ–რაუნდის მატჩები ბელგიაში ასევე 25, 28 და 31 მარტს გაიმართება.
რაც შეეხება 2021 წლის ევროპის ჩემპიონატის შესარჩევ რაუნდებს, საქართველოს 17-წლამდელთა ნაკრების მეტოქეები ბელგია, უკრაინა და ლიეტუვა იქნებიან. გიორგი მიქაძის 19-წლამდე ნაკრები კი ხორვატიის, ლატვიისა და ყაზახეთის გუნდებს შეხვდება.
ორივე ასაკობრივ ჯგუფში მატჩები 2020 წლის შემოდგომაზე გაიმართება.
