თბილისი, 11 ივნისი – Sputnik. საქართველოში დაბრუნებული 185 მიგრანტი სახელმწიფოსგან გრანტებს მიიღებს, რაც მათ სამშობლოში დამკვიდრებაში დაეხმარება, ნათქვამია დევნილთა, ეკომიგრანტთა და საარსებო წყაროებით უზრუნველყოფის სააგენტოს განცხადებაში.
სახელმწიფო პროგრამის მიზანია აღნიშნული პირების შემოსავლის წყაროთი უზრყნველყოფა და მათი რეინტეგრაციისთვის შესაბამისი პირობების შექმნა.
185 მიგრანტი, რომლებიც სახელმწიფოსგან დაფინანსებას მიიღებენ, სპეციალურმა კომისიამ წინასწარ განსაზღვრული კრიტერიუმების შესაბამისად შეარჩია. გრანტის მაქსიმალური მოცულობა 4 ათასი ლარია.
როგორც სააგენტოში აღნიშნავენ, პროექტების დაფინანსებასთან ერთად, პროგრამა ითვალისწინებს პროფესიული განათლებით, სამედიცინო დახმარებითა და დროებითი საცხოვრებლით მათ უზრუნველყოფას.
საქართველოს მთავრობის ერთ-ერთ პრიორიტეტს სამშობლოში დაბრუნებული მიგრანტების ინტეგრაციის ხელშეწყობა წარმოადგენს. სწორედ ამ მიზნით 2015 წლიდან „საქართველოში დაბრუნებულ მიგრანტთა სარეინტეგრაციო დახმარების პროგრამა“ ხორციელდება. 2020 წლიდან კი დევნილთა, ეკომიგრანტთა და საარსებო წყაროებით უზრუნველყოფის სააგენტო რეინტეგრაციის პროგრამას ახორციელებს.
აღნიშნული პროგრამა ვრცელდება საქართველოს იმ მოქალაქეებზე, რომლებიც საზღვარგარეთ ერთ წელზე მეტხანს არალეგალურად იმყოფებოდნენ, ან ჰქონდათ განაცხადი თავშესაფრის მიღებაზე, ან სარგებლობდნენ თავშესაფრით.
