თბილისი, 7 ივნისი – Sputnik. კულტურის მინისტრმა თეა წულუკიანმა ტელეწამყვან ნოე სულაბერიძესთან გადაცემაში პირად ცხოვრებაზე ისაუბრა და აღნიშნა, რომ პირველი შვილი 42 წლის ასაკში გააჩინა, ამიტომ შვილისთვის იმდენი დრო არ აქვს დარჩენილი, რამდენიც, ვთქვათ, 20 წლის დედას, თუმცა მეგობრული ურთიერთობა აქვს შვილთან და მის გამო ცხოვრების წესიც შეიცვალა.
წულუკიანის თქმით, მის მეუღლეს დაქორწინების შემდეგ იუსტიციის სასწავლო ცენტრის დირექტორის თანამდებობა 2016 წლის სექტემბერში იმიტომ კი არ დაუტოვებია, რომ ინტერესთა კონფლიქტი იყო და ამგვარი საუბრების შეეშინდათ, არამედ იმიტომ, რომ მისთვის მიუღებელი იყო ყოფილიყო მისი ქმრის უფროსი.
„ჩემთვის მიუღებელი იქნებოდა, რომ ვყოფილიყავი ჩემივე ქმრის უფროსი. ეს უბრალოდ უპატივცემულობაა ჩემივე ოჯახის. ჩვენ ერთმანეთის ნამდვილი მეგობრები ვართ და არც ერთი პოლიტიკური ბრძოლა არ წამომიწყია მისი აზრის გარეშე, ალბათ იმიტომაც, რომ ერთმანეთი საარჩევნო შტაბში გავიცანით. თანამდებობის პირი კაცის ცოლობა ხომ არის ძალიან დიდი ტვირთი და უფრო დიდი ტვირთია თანამდებობის ქალის ქმრობა. ჩემი მეუღლე არის სამაგალითო, რომ ამ ტვირთს ღირსეულად ატარებს“, – განაცხადა თეა წულუკიანმა.
კულტურის მინისტრი საქართველოს იუსტიციის მინისტრად ყოფნის პერიოდში, 2016 წელს დაქორწინდა. ინფორმაცია თავად მინისტრმა სოციალური ქსელის მეშვეობით გაავრცელა. თეა წულუკიანმა „ფეისბუქის“ პირად გვერდზე ქორწინების მოწმობის და მეუღლის ფოტოც გამოაქვეყნა წარწერით - Voilà!
მინისტრის მეუღლე საქართველოს იუსტიციის სასწავლო ცენტრის ყოფილი დირექტორი ნუგზარ კაკულიაა. იგი სასწავლო ცენტრს 2014 წლის 3 ნოემბრიდან 2016 წლის 12 სექტემბრამდე ხელმძღვანელობდა. მინისტრის რჩეული მასზე 9 წლით უმცროსია – კაკულია დაქორწინებისას 32 წლის, თეა წულუკიანი კი 41-ის იყო. წყვილს საერთოდ შვილი მერიკო ჰყავს.
