თბილისი, 5 მაისი – Sputnik. საქართველოს მთელ ტერიტორიაზე საფლავებზე გასვლა 5 მაისიდან ნებადართულია.
მთავრობის დადგენილების თანახმად, ქვეყანაში 2–4 მაისის პერიოდში სასაფლაოებზე გასვლაზე შეზღუდვა მოქმედებდა. აღნიშნული გადაწყვეტილება ხელისუფლებამ აღდგომის დღეებში კორონავირუსის გავრცელების პრევენციისა და მობილობის შემცირების მიზნით მიიღო. აღნიშნული შეზღუდვის დარღვევა ითვალისწინებს ჯარიმას 2 ათასი ლარის ოდენობით.
დღეიდან სასაფლაოებთან მისასვლელ გზებს საპატრულო პოლიცია აღარ აკონტროლებს.
ბრწყინვალე შვიდეულის პირველ დღეს მართლმადიდებლური ეკლესია საფლავთა კურთხევას აღნიშნავს. ამ დღეს მორწმუნეები მიცვალებულთა საფლავებზე გადიან, რათა უფლის აღდგომა მათაც ახარონ. ტრადიციის მიხედვით, მათ თან პასკა და წითელი კვერცხები მიაქვთ.
თუმცა, კორონავირუსის გავრცელების პრევენციის მიზნით მთავრობამ საქართველოს მასშტაბით 2–4 მაისის პერიოდში საფლავებზე გასვლა აკრძალა. გამონაკლისი მხოლოდ სასულიერო პირებისთვის დაიშვა, რომლებმაც საფლავები აკურთხეს.
გარდა საფლავებზე გასვლის შეზღუდვისა, საქართველოში 13 მაისამდე უქმეები დაწესდა და 3–12 მაისის პერიოდში მუნიციპალური ტრანსპორტის მოძრაობა შეიზღუდა.