თბილისი, 17 აპრილი - Sputnik. საქართველოში ბოლო დროს განვითარებულმა მოვლენებმა, რასაც საზოგადოება აქტიურად განიხილავს, ორიგინალურად „გადაინაცვლა“ კინოსამყაროში, ხოლო ამ მოვლენების მთავარი ფიგურები ცნობილი სერიალ Game of Thrones-ის პერსონაჟების ორეულებად იქცნენ.
ყველაფერი კი იმით დაიწყო, რომ „ნამახვანჰესის“ მშენებლობის წინააღმდეგ მიმდინარე პროტესტის ლიდერი ვარლამ გოლეთიანი „სამეფო კარის თამაშების“ გმირ ჯონ სნოუს მიამსგავსეს. სოციალური ქსელის მომხმარებლებმა ინტერნეტი მაშინვე ჯონის და ვარლამის ფოტოკოლაჯებით გაავსეს.
მაგრამ ვარლამი, რომელსაც ეს სერიალი არ უნახავს, ამ ყველაფერს ყურადღებას არ აქცევს.
„არა მხოლოდ მე, პროტესტში ჩართული ყველა პირს ამსგავსებენ ვიღაც პერსონაჟებს. ეს მსგავსებები და დამთხვევები ჩემთვის ცოტა სასაცილოა. სამწუხაროდ, ეს სერიალი არ მინახავს“, - აცხადებს ვარლამ გოლეთიანი.
აღსანიშნავია, რომ ვარლამის გარდა, „სამეფო კარის თამაშების“ გმირებს მიამსგავსეს მისი რამდენიმე თანამოაზრე და დედა, რომელიც საპროტესტო აქციებზე შვილს გვერდში უდგას.
სოციალური ქსელების გონებამახვილი მომხმარებლები ამაზე არ გაჩერებულან და მათმა მახვილმა თვალმა სერიალის სხვა პერსონაჟების ორეულებიც აღმოაჩინა ხელისუფლებაში, პარლამენტში, მინისტრებს შორის. ასე მაგალითად, ორეული მოუძებნეს ეკონომიკის მინისტრ ნათია თურნავას (სერსეა ლანისტერი), პარტია „ქართული ოცნების“ თავმჯდომარე ირაკლი კობახიძეს (რამსეი ბოლტონი), კულტურის მინისტრ თეა წულუკიანს (ჯოფრი ბარათეონი), ჯანდაცვის მინისტრ ეკატერინე ტიკარაძეს (იაკენ ჰგარი), პარტია „ლელს“ ლიდერს მამუკა ხაზარაძეს (ტაივინ ლანისტერ), პარტია „მოქალაქეების“ ლიდერს ალეკო ელისაშვილს (პეტირ ბეილიში), „გირჩის“ ლიდერს იაგო ხვიჩიას (სტანის ბარათეონი), პოლიტიკოს ელენე ხოშტარიას (ბრიენა ტარტი) და ევროპული საბჭოს პრეზიდენტის სპეციალურ წარმომადგენელს ქრისტიან დანიელსონს, რომელიც საქართველოში პოლიტიკური კრიზისის მოსაგვარებლად ჩამოდიოდა (ჯორაჰ მორმონტი).
საქართველოს უმდიდრესი ადამიანი ბიძინა ივანიშვილი წყვდიადის მბრძანებელს შეადარეს:
საქართველოს ყოფილი პრემიერი გიორგი გახარია - დრაკონი:
თბილისის მერი კახა კალაძე - ობერინ მარტელს მიამსგავსეს:
არ დაავიწყდათ თბილისის პირველი საუნივერსიტეტო კლინიკის დირექტორი ლევან რატიანი და პრეზიდენტი ედუარდ შევარდნაძე. ეს უკანასკნელი შეადარეს ჯორჯ რ.რ. მარტინს, რომლის რომანის „ყინულისა და ცეცხლის სიმღერა“ საფუძველზეც გადაიღეს ეს სერიალი.
ამასთან, მხიარული კოლაჟების ავტორებმა ინკოგნიტოდ დარჩენა ამჯობინეს.
„სამეფო კარის თამაშები" (Game of Thrones) - ფენტეზის ჟანრის სერიალი, რომელიც ტელეარხ HBO-თვის არის გადაღებული. პირველი სეზონის პრემიერა აშშ-ში 2011 წელს შედგა. „თამაშების“ მოქმედება ვითარდება გამოგონილ სამყაროში, რომელიც მიმსგავსებულია შუა საუკუნეების ევროპას, სადაც შვიდი სამეფოს რკინის ტახტისთვის რამდენიმე გავლენიანი ოჯახი იბრძვის. სერიალში ასევე სხვადასხვა ფანტასტიკური არსებები არიან.
ტელესერიალმა მაყურებლების მაღალი შეფასებები დაიმსახურა, ხოლო საგის ირგვლივ ფანების უზარმაზარი საზოგადოება შეიქმნა.